കോവിഡ്​; എയിംസ്​ ഡോക്​ടർമാർ അഹ്​മദാബാദിൽ

അഹ്​മദാബാദ്​: ഗുജറാത്തിൽ കോവിഡ്​ വ്യാപിക്കുന്ന സാഹചര്യത്തിൽ ഡൽഹി ഓൾ ഇന്ത്യ ഇൻസ്​റ്റിറ്റ്യുട്ട്​ ഓഫ്​ മെഡിക്കൽ സയൻസസിലെ (എയിംസിലെ) ഡോക്​ടർമാർ ഗുജറാത്തിലെത്തി. ആഭ്യന്തരമന്ത്രി അമിത്​ ഷായുടെ പ്രത്യേക നിർദേശ പ്രകാരമാണ്​ ഡോക്​ടർമാർ സംസ്​ഥാന​ത്തേക്ക്​ പുറപ്പെട്ടത്​. രോഗബാധിതർ കൂടുതലുള്ള അഹ്​മദാബാദിലെ ആശുപത്രി സന്ദർശിക്കുകയും അവിടത്തെ ഡോക്​ടർമാർക്ക് മാർഗനിർദേശം നൽകുകയും ചെയ്​തു. 

വ്യോമസേനയുടെ പ്രത്യേക വിമാനത്തിലാണ്​ എയിംസ്​ ഡയറക്​ടറും ശ്വാസകോശ രോഗ വിദഗ്​ധനുമായ ഡോ. രൺദീപ്​ ഗുലേറിയ, ഡോ. മനീഷ്​ സുരേജ എന്നിവർ ഗുജറാത്തിലെത്തിയത്​.  

അഹ്​മദാബാദിലെ എസ്​.വി.പി ആശുപത്രി, അഹ്​മദാബാദ്​ സിവിൽ ആശുപത്രി എന്നിവിടങ്ങളിലെത്തി എയിംസ്​ ഡയറക്​ടർ ചികിത്സ നിർദേശങ്ങൾ നൽകും. ഗുജറാത്ത്​ പ്രിൻസിപ്പൽ സെക്രട്ടറിയായും മുഖ്യമന്ത്രി വിജയ്​ രൂപാനിയായും കൂടിക്കാഴ്​ച നടത്തുമെന്നാണ്​ വിവരം. 

ഗുജറാത്തിൽ ഇതുവരെ 7402 പേർക്കാണ്​ കോവിഡ്​ സ്​ഥിരീകരിച്ചത്​. 449 പേർ മരിക്കുകയും ചെയ്​തു. കഴിഞ്ഞ 24 മണിക്കൂറിനുള്ളിൽ 390 പേർക്കാണ്​ പുതുതായി രോഗം കണ്ടെത്തിയത്​.