അജിത് ഡോവലിന്റെ സുരക്ഷാ വീഴ്ചയിൽ ഉദ്യോഗസ്ഥരെ മാറ്റി കേന്ദ്രസർക്കാർ

ന്യൂഡൽഹി: ദേശീയ സുരക്ഷാ ഉപദേഷ്ടാവ് അജിത് ഡോവലിന്റെ സുരക്ഷാവീഴ്ചയിൽ നടപടിയുമായി കേന്ദ്രസർക്കാർ. ​ഫെബ്രുവരിയിൽ നടന്ന സംഭവത്തിൽ ഇപ്പോഴാണ് നടപടിയെടുക്കുന്നത്. കേന്ദ്രസർക്കാർ വൃത്തങ്ങളെ ഉദ്ധരിച്ച് ഇന്ത്യ ടുഡേയാണ് വാർത്ത റിപ്പോർട്ട് ചെയ്തത്.

ഡെപ്യൂട്ടി ഇൻസ്‍പെക്ടർ ജനറൽ, കമാൻഡന്റ് അസോസിയേറ്റ് തുടങ്ങിയ ഉദ്യോഗസ്ഥരെയാണ് മാറ്റിയതെന്നാണ് സൂചന. എന്നാൽ, ഇവ​രെ ഏത് ചുമതലയിലേക്കാണ് മാറ്റിയതെന്നത് സംബന്ധിച്ച് റിപ്പോർട്ടുകൾ പുറത്ത് വന്നിട്ടില്ല. ഡോവലിന്റെ വസതിയിലേക്ക് യുവാവ് എസ്.യു.വി ഇടിച്ചുകയറ്റാൻ ശ്രമിച്ച സംഭവത്തിലാണ് നടപടി.

എന്നാൽ, സി.ഐ.എസ്.എഫ് സൈനികർ ശ്രമം തകർത്തു. വിശദമായ പരിശോധനയിൽ എസ്.യു.വി ഇടിച്ചു കയറ്റാൻ ശ്രമിച്ചയാൾക്ക് മാനസികരോഗമാണെന്ന് കണ്ടെത്തുകയായിരുന്നു.