'ദേശ സുരക്ഷ' പറഞ്ഞ്​ സർക്കാർ ജീവന​ക്കാരെ നോട്ടീസില്ലാതെ പുറത്താക്കി; കശ്​മീരിൽ ഭീതിയായി ഗവർണറുടെ പുതിയ നീക്കം

ശ്രീനഗർ: കശ്​മീരിൽ 'ദേശ സുരക്ഷ' കാരണം പറഞ്ഞ്​ അന്വേഷണമില്ലാതെ ജീവനക്കാരെ പുറത്താക്കി ഗവർണർ. മൂന്നു പേർക്കെതിരെയാണ്​ കഴിഞ്ഞ ദിവസങ്ങളിൽ നടപടി സ്വീകരിച്ചത്​. ഭരണഘടനയുടെ 31 1(2) പ്രകാരം സർക്കാർ ജീവനക്കാരെ നിരുപാധികം പുറത്താക്കാനാകില്ല. അന്വേഷണം നടത്തി തൃപ്​തികരമായ കാരണമെന്നു ബോധ്യപ്പെട്ടാലേ നടപടിയെടുക്കാനാവൂ. എന്നാൽ, പ്രസിഡൻറിനോ ഗവർണർക്കോ അന്വേഷണം വേണ്ടെന്ന്​ ബോധ്യമാകുന്ന പക്ഷം നടപടി ഇതേ വകുപ്പിലെ 31 1(2) (സി) പ്രകാരം സ്വീകരിക്കാം. ഈ വകുപ്പ്​ പ്രകാരം നടപടി സ്വീകരിക്കാൻ അധികാരം നൽകി പ്രത്യേക ടാസ്​ക്​ ഫോഴ്​സിനെ ഏപ്രിൽ 21ന്​ ഗവർണർ ചുമതലപ്പെടുത്തിയിരുന്നു. ടാസ്​ക്​ ഫോഴ്​സ്​ നിലവിൽ വന്ന്​ ഒമ്പതു ദിവസങ്ങൾക്കുള്ളിൽ മൂന്നുപേരെ പുറത്താക്കാനാണ്​ ഗവർണർക്ക്​ ശിപാർശ നൽകിയത്​. അസി. പ്രഫസർ അബ്​ദുൽ ബാരി നായ്​ക്​, പുൽവാമയിലെ നാഇബ്​ തഹസിൽദാർ നാസിർ അഹ്​മദ്​ വാനി, സ്​കൂൾ അധ്യാപകൻ ഇദ്​രീസ്​ ജാൻ എന്നിവരെയാണ്​ പിരിച്ചുവിട്ടത്​. ദേശ സുരക്ഷ പരിഗണിച്ചായതിനാൽ അന്വേഷണം നടത്തേണ്ടതില്ലെന്ന്​ ഗവർണർ നൽകിയ ഉത്തരവിൽ പറയുന്നു.

2007ൽ സർവീസിൽ കയറിയ ഇദ്​രീസിനെ പൊലീസ്​ എത്തിയാണ്​ പുറത്താക്കുന്ന വിവരം അറിയിച്ചത്​.

മറ്റു രണ്ടു പേർക്കുമെതിരെ കുറ്റപത്രം സമർപിച്ചിട്ടില്ലെങ്കിലും വിവി ധ കാരണങ്ങളുടെ പേരിൽ ജയിലിലടച്ചിട്ടുണ്ട്​. ഭൂമിശാസ്​ത്രത്തിൽ അസി. പ്രഫസറായ അബ്​ദുൽ ബാരിക്കെതിരെ യു.എ.പി.എ ചുമത്തി കേസ്​ എടുത്തിട്ടുണ്ട്​. എന്നാൽ, പ്രദേശത്തെ ഖനന മാഫിയക്കെതിരെ വിവരങ്ങൾ പുറത്തുകൊണ്ടുവന്നതിനാണ്​ നടപടിയെന്ന്​ കുടുംബം കുറ്റപ്പെടുത്തി.

ജമ്മു കശ്​മീരിൽ സർക്കാർ ജീവനക്കാരായി 4.5 ലക്ഷം പേരുണ്ട്​. ഇവർക്കെതിരെ ഗവർണർ നേരിട്ട്​ ഇടപെട്ട്​ നടപടി എടുത്തു തുടങ്ങുന്നത്​ ഭരണഘടന വിരുദ്ധമാണെന്ന്​ കശ്​മീർ സംയുക്​ത തൊഴിലാളി സമിതി പ്രസിഡൻറ്​ മുഹമ്മദ്​ റഫീഖ്​ റാവുത്തർ പറഞ്ഞു.

സംസ്​ഥാനത്തെ തൊഴിലാളികൾക്കിടയിൽ കടുത്ത ആശങ്കയുയർത്തുന്നതാണ്​ പുതിയ നീക്കം.