ഭബാനിപൂരിലേക്ക്​ കണ്ണുംനട്ട്​; ബംഗാൾ ഉപതെരഞ്ഞെടുപ്പിൽ വോ​ട്ടെണ്ണൽ തുടങ്ങി

കൊൽക്കത്ത: പശ്ചിമബംഗാളിലെ ഭബാനിപൂർ ഉൾപ്പെടെ മൂന്ന്​ മണ്ഡലങ്ങളിലേക്ക്​ നടന്ന ഉപതെരഞ്ഞെടുപ്പിന്‍റെ വോ​ട്ടെണ്ണൽ ആരംഭിച്ചു. രാവിലെ എട്ടുമണിക്കാണ്​ വോ​ട്ടെണ്ണൽ ആരംഭിച്ചത്​.

മുഖ്യമന്ത്രി മമത ബാനർജി മത്സരിക്കുന്ന മണ്ഡലമാണ്​ ഭബാനിപൂർ. ബി.ജെ.പിയുടെ പ്രിയങ്ക തി​ബ്രേവാളാണ്​ എതിർ സ്​ഥാനാർഥി. സി.പി.എമ്മിന്‍റെ ശ്രീജിബ്​ ബിശ്വാസും മത്സര രംഗത്തുണ്ട്​. നന്ദിഗ്രാമിൽ തൃണമൂൽ കോൺഗ്രസ്​ വിട്ട്​ ബി.ജെ.പിയിലെത്തിയ സുവേന്ദു അധികാരിയോട്​ പരാജയപ്പെട്ടതിനെ തുടർന്നാണ്​ മമത സ്വന്തം മണ്ഡലമായ ഭബാനിപൂരിൽനിന്ന്​ ജനവിധി തേടിയത്​. തെരഞ്ഞെടുപ്പിൽ പരാജയപ്പെട്ട ഒരാൾ മ​ന്ത്രിസ്​ഥാനത്തെത്തിയാൽ ആറുമാസത്തിനകം തെരഞ്ഞെടുപ്പിനെ നേരിടണമെന്നാണ്​ ചട്ടം.

21 ഘട്ടങ്ങളാണ്​ വോ​ട്ടെണ്ണൽ. തെരഞ്ഞെടുപ്പിനോട്​ അനുബന്ധിച്ച്​ തെരഞ്ഞെടുപ്പ്​ കമ്മീഷൻ സുരക്ഷ കർശനമാക്കി. തെരഞ്ഞെടുപ്പിന്​ ശേഷം സംസ്​ഥാനത്ത്​ വ്യാപകമായി അരങ്ങേറിയ അക്രമസംഭവങ്ങൾ കണക്കിലെടുത്താണ്​ തീരുമാനം. ത്രിതല സുരക്ഷ സംവിധാനം ഏ​ർപ്പെടുത്തുകയും 24 കമ്പനി കേന്ദ്ര സേനയെയും ഭവാനിപൂരിൽ വിന്യസിക്കുകയും ചെയ്​തു.

ഭബാനിപൂരിന്​ പുറമെ സംസർഗഞ്ച്​, ജാൻഗിപുർ എന്നിവിടങ്ങളിലുമാണ്​ വോ​ട്ടെടുപ്പ്​ നടന്നത്​. 57 ശതമാനമാണ്​ ഭബാനിപൂരിലെ വോട്ടിങ്​ ശതമാനം. സംസർഗഞ്ചിൽ 79ഉം ജാൻഗിപുരിൽ 77 ​ശതമാനം പേരും വോട്ട്​ രേഖപ്പെടുത്തി.