റോഹിങ്ക്യകളെല്ലാവരും തീവ്രവാദികളല്ലെന്ന്​ മമത

ന്യൂഡൽഹി: റോഹിങ്ക്യൻ അഭയാർഥിക​​ളെ തിരിച്ചുവിടണമെന്ന കേന്ദ്രസർക്കാർ നിലപാടിനെതിരെ പശ്ചിമബംഗാൾ മുഖ്യമന്ത്രി മമത ബാനർജി. അതിർത്തി കടന്ന്​ പശ്ചിമബംഗാളിൽ എത്തിയിരിക്കുന്ന റോഹിങ്ക്യൻ അഭയാർഥികളെ നാടുകടത്തണമെന്ന്​ കേന്ദ്രസർക്കാർ ആവശ്യപ്പെട്ടിരിക്കുന്നു. എന്നാൽ അഭയാർഥികളായി എത്തിയിരിക്കുന്ന റോഹിങ്ക്യകളെല്ലാം തീവ്രവാദികളല്ല.  അവർക്കിടയിൽ തീവ്രവാദപ്രവർത്തനം നടത്തുന്നവരുണ്ട്​. അവരെ മാത്രമാണ്​ തീവ്രവാദികളെന്ന്​ മുദ്രകുത്തി നാടുകടത്തേണ്ടത്​. എന്നാൽ അഭയാർഥികൾക്കിടയിൽ നിന്ന്​ പ്രശ്​നക്കാരെ എങ്ങനെ കണ്ടെത്തുമെന്ന ആശങ്കയുണ്ടെന്നും മമത ബാനർജി പറഞ്ഞു. അഭയാർഥി വിഷയത്തിൽ നിയമസഭയിൽ സംസാരിക്കുകയായിരുന്നു അവർ. 

 റോഹിങ്ക്യൻ അഭയാർത്ഥികൾ ഇന്ത്യയിൽ നിൽക്കുന്നത് പൂർണമായും നിയമവിരുദ്ധമാണെന്നും അവർ ഇന്ത്യയിൽ തുടരുന്നത് ഗുരുതരമായ സുരക്ഷാ ഭീഷണി സൃഷ്ടിക്കുമെന്നും കേന്ദ്രസർക്കാർ ഇന്ന്​ സുപ്രീംകോടതിയിൽ സമർപ്പിച്ച സത്യവാങ്​മൂലത്തിൽ വ്യക്തമാക്കിയിരുന്നു. അഭയാർഥികളെ സ്വീകരിക്കുന്നത്​ ദേശീയ സുരക്ഷ മാത്രമല്ല, നയതന്ത്ര പ്രശ്നം കൂടിയാണെന്നും റോഹിങ്ക്യകൾക്ക് തീവ്രവാദ ബന്ധമുണ്ടെന്നുമാണ്​ കേന്ദ്രസർക്കാർ വാദം.