ഇന്ത്യക്കെതിരെ ഗൽവാൻ ആക്രമണത്തിൽ ഉപയോഗിച്ച ആയുധങ്ങൾ വീണ്ടും വാങ്ങിക്കൂട്ടി ചൈന

അതിർത്തി തർക്കത്തിനിടെ, ഇന്ത്യക്കെതിരെ ഗൽവാൻ ആക്രമണത്തിൽ ഉപയോഗിച്ച ആയുധങ്ങൾ വീണ്ടും ചൈന വാങ്ങിക്കൂട്ടുന്നതായി ‘ഇന്ത്യ ടുഡേ’ റിപ്പോർട്ട്​ ചെയ്​തു. കഴിഞ്ഞയാഴ്ച ന്യൂഡൽഹിയിൽ നടന്ന ജി 20 മീറ്റിങിൽ ഇന്ത്യ-ചൈന ഉഭയകക്ഷി ബന്ധം ശക്​തിപ്പെടുത്തുന്നതിന്​ ഇരു രാജ്യങ്ങളുടെയും പ്രതിനിധികൾ തമ്മിൽ സംസാരിച്ചതിന്​ പിന്നാലെയാണ്​ പുതിയ വാർത്ത ഇന്ത്യ ടുഡേ റിപ്പോർട്ട്​ ചെയുന്നത്​. ഗൽവാൻ ഇനിയും ആവർത്തിക്കാനുള്ള കോപ്പുകൂട്ടലാണ്​ ചൈന നടത്തുന്നത്​ എന്നും റിപ്പോർട്ട്​ പറയുന്നു.

അതിർത്തി തർക്കത്തിൽ ചൈന പിൻവാങ്ങൽ ചർച്ചകൾ നടത്തുകയും യോജിപ്പിന്റെ സമീപനം മുന്നോട്ടുവെക്കുകയുംചെയ്യുന്നുണ്ടെങ്കിലും, 2020 ലെ മാരകമായ ഗൽവാൻ ഏറ്റുമുട്ടലിൽ ഉപയോഗിച്ചതിന് സമാനമായ കൈ ​കൊണ്ട്​ പ്രയോഗിക്കുന്ന ആയുധങ്ങൾ വാങ്ങുന്ന തിരക്കിലാണ്​ ചൈന എന്നും ഇന്ത്യ ടുഡേ റിപ്പോർട്ടിൽ പറയുന്നു.

20 ഇന്ത്യൻ സൈനികരുടെ ജീവൻ അപഹരിച്ച 2020ലെ ഗൽവാൻ താഴ്വരയിലെ ഏറ്റുമുട്ടലിൽ ഉപയോഗിച്ച ആയുധ വിഭാഗത്തിൽ പെടുന്ന മുള്ളുകൾ പതിച്ച ഗദ കണക്കെയുള്ള ആയുധങ്ങളും ചൈനയുടെ പീപ്പിൾസ് ലിബറേഷൻ ആർമി (പി.എൽ.എ) വാങ്ങിയതായാണ്​ വിവരം.