രാജസ്​ഥാനിൽ മന്ത്രിസഭ പുനഃസംഘടന ഉടനെന്ന്​ സൂചന; ഗെഹ്​ലോട്ടുമായി രാഹുലിന്‍റെ കൂടിക്കാഴ്ച

ന്യൂഡൽഹി: രാജസ്​ഥാനിൽ മന്ത്രിസഭ പുന:സംഘടന ഉടനുണ്ടാകുമെന്ന്​ സൂചന നൽകി കോൺഗ്രസ്​ നേതാവ്​ രാഹുൽ ഗാന്ധി മുഖ്യമന്ത്രി അശോക്​ ഗെഹ്​ലോട്ടുമായി കൂടിക്കാഴ്ച നടത്തി. രാഹുലിന്‍റെ തുഗ്ലക്​ ലെയ്​നിലെ വസതിയിൽ നടന്ന കൂടിക്കാഴ്ച ഒരുമണിക്കൂറോളം നീണ്ടുനിന്നു. എ.ഐ.സി.സി ജനറൽ സെക്രട്ടറി പ്രിയങ്ക ഗാന്ധി, കെ.സി. വേണുഗോപാൽ, അജയ്​ മാക്കൻ എന്നിവർ രാഹുലിനെപ്പം യോഗത്തിൽ പ​ങ്കെടുത്തു.

കാബിനറ്റ്​ പുനസംഘടനയും സംഘടന നേതൃമാറ്റവും ചർച്ച ചെയ്യാനായാണ്​ രാഹുൽ ഗെഹ്​ലോട്ടിനെ കണ്ടതെന്നാണ്​ റിപ്പോർട്ടുകൾ. പഞ്ചാബിൽ മുഖ്യമന്ത്രിയെ മാറ്റിയതിന്​ പിന്നാലെ രാജസ്​ഥാനിൽ മന്ത്രിസഭ വികസിപ്പിക്കണമെന്നാവശ്യപ്പെട്ട്​ മുൻ ഉപമുഖ്യമന്ത്രിയും പി.സി.സി അധ്യക്ഷനുമായിരുന്ന സചിൻ പൈലറ്റ്​ ഹൈക്കമാൻഡിനെ കണ്ടിരുന്നു.

കാബിനറ്റ് പുന:സംഘടനക്കൊപ്പം സംസ്ഥാനത്തെ ബോർഡുകളിലേക്കും കോർപറേഷനുകളിലേക്കും നിയമനങ്ങളും ഉടൻ നടത്തണമെന്ന്​ പൈലറ്റ് ദീർഘകാലമായി ആവശ്യപ്പെടുന്നുണ്ട്​. തന്‍റെ അടുത്ത അനുയായികൾക്ക്​ അർഹമായ സ്​ഥാനങ്ങൾ നൽകണമെന്നാണ്​ അദ്ദേഹത്തിന്‍റെ ആവശ്യം.

സംസ്ഥാനത്തെ സംഘടനാ നേതൃമാറ്റത്തിന്‍റെയും മന്ത്രിസഭ വിപുലീകരണത്തിന്‍റെയും റോഡ്മാപ്പ് തയാറാണെന്ന് കഴിഞ്ഞ മാസം അജയ്​ മാക്കൻ പറഞ്ഞിരുന്നു.