ബാബ സിദ്ദീഖി കോൺഗ്രസ്​ വിടുമെന്ന്​ അഭ്യൂഹം

മുംബൈ : മുംബൈ കോൺഗ്രസിലെ പ്രമുഖ നേതാവ്​ ബാബ സിദ്ദീഖി കോൺഗ്രസ്​ വിടുമെന്ന്​ അഭ്യൂഹം. കഴിഞ്ഞ ദിവസം എൻ.സി.പി വിമതപക്ഷ നേതാവും മഹാരാഷ്ട്ര ഉപമുഖ്യമന്ത്രിയുമായ അജിത്​ പവാറുമായി ബാബ സിദ്ദീഖി നടത്തിയ കൂടിക്കാഴ്ചയാണ്​ അഭ്യൂഹങ്ങൾക്ക്​ കാരണം​. കുടുംബസുഹൃത്തുക്കളുടെ കൂടിക്കാഴ്ചക്കപ്പുറം മറ്റൊന്നും അതിലില്ലെന്ന്​ ബാബ സിദ്ദീഖിയും കോൺഗ്രസ്​ എം.എൽ.എയായ മകൻ സീഷാൻ സിദ്ദീഖിയും അവകാശപ്പെട്ടു.

മുൻ കേന്ദ്രമന്ത്രി മിലിന്ദ്​ ദേവ്​റ ഈയിടെ ഷിൻഡെ പക്ഷ ശിവസേനയിലേക്ക്​ കൂറുമാറിയിരുന്നു​. 2017 മുതൽ ചേരി പുനർനിർമാണ പദ്ധതിയുമായി ബന്ധപ്പെട്ട കള്ളപ്പണക്കേസിൽ ബാബ സിദ്ദീഖി ഇ.ഡി നിരീക്ഷണത്തിലാണ്. 1999 മുതൽ 2014 വരെ ബാന്ദ്ര വെസ്റ്റ്​ മണ്ഡലത്തിൽ എം.എൽ.എയായിരുന്ന ഇദ്ദേഹം സഹമന്ത്രി പദവും വഹിച്ചിട്ടുണ്ട്​.