മാനനഷ്ടക്കേസിൽ അമിത്​ഷാ ഹാജരാകണമെന്ന്​ ​ബംഗാൾ കോടതി

കൊൽക്കത്ത: അപകീർത്തികരമായ പരാമർശം നടത്തിയെന്ന കേസിൽ കേന്ദ്ര ആഭ്യന്തരമന്ത്രി അമിത്​ഷാ​ ഹാജരാകണമെന്ന്​ ബംഗാൾ കോടതി. തൃണമൂൽ കോൺഗ്രസ് എം.പിയും മമത ബാനർജിയുടെ അനന്തരവനുമായ അഭിഷേക് ബാനർജി സമർപ്പിച്ച മാനനഷ്ടക്കേസിലാണ്​ ബിദാനഗറിലെ എം‌.പി, എം‌.എൽ.‌എ കോടതി പ്രത്യേക ജഡ്ജി സമൻസ്​ പുറപ്പെടുവിച്ചത്​.

ഈ മാസം 22ന് രാവിലെ 10 മണിക്ക് അമിത് ഷാ നേരി​ട്ടോ അഭിഭാഷകൻ മുഖേനയോ ഹാജരാകണമെന്നാണ്​ നിർദേശം. ഇന്ത്യൻ പീനൽ കോഡിലെ (ഐ.പി.സി) 500ാം വകുപ്പ് പ്രകാരമാണ്​ മാനനഷ്ടക്കേസ്​ രജിസ്റ്റർ ചെയ്​തത്​.

2018 ഓഗസ്റ്റ് 11ന് കൊൽക്കത്ത മായോ റോഡിൽ നടന്ന ബി.ജെ.പി റാലിയിൽ തൃണമൂൽ എംപി അഭിഷേക് ബാനർജിക്കെതിരെ അമിത് ഷാ അപകീർത്തികരമായ പ്രസ്താവന നടത്തിയതിനാണ്​ നടപടിയെന്ന്​ അഭിഭാഷകൻ സഞ്ജയ് ബസു വാർത്താകുറിപ്പിൽ പറഞ്ഞു.