ആറ്​ തൃണമൂൽ, രണ്ട്​ സി.പി.എം, സി.പി.ഐ, കോൺഗ്രസ്​ എം.എൽ.എമാർ ബി.​െജ.പിയിൽ

മിഡ്​നാപുർ (പശ്ചിമ ബംഗാൾ): നിയമസഭ തെരഞ്ഞെടുപ്പ്​ അടുത്തിരിക്കെ ഭരണകക്ഷിയായ തൃണമൂൽ കോൺഗ്രസിനും മുഖ്യമന്ത്രി മമത ബാനർജിക്കും വൻ തിരിച്ചടിയായി ബി.ജെ.പിയിലേക്ക്​ പാർട്ടി എം.എൽ.എമാരുടെ കൂറുമാറ്റം. സംസ്ഥാനത്ത്​ വൻ സ്വാധീനമുള്ള നന്ദിഗ്രാം എം.എൽ.എ സുവേന്ദു അധികാരി അടക്കം ആറ്​ തൃണമൂൽ എം.എൽ.എമാർ ശനിയാഴ്​ച മിഡ്​നാപുരിൽ കേന്ദ്ര ആഭ്യന്തര മന്ത്രി അമിത്​ ഷാ പ​ങ്കെടുത്ത റാലിയിൽ ബി.ജെ.പിയിൽ ചേർന്നു. രണ്ട്​ സി.പി.എം, ഒാരോ സി.പി.ഐ, കോൺഗ്രസ്​ എം.എൽ.എമാരും ബി.ജെ.പിയിലെത്തി.

ബർധമാൻ പൂർബ ലോക്​സഭ മണ്ഡലത്തിൽനിന്ന്​ രണ്ടു വട്ടം ടി.എം.സി എം.പിയായ സുനിൽ മൊണ്ഡലും ബി.ജെ.പിയിൽ ചേർന്നു. സുവേന്ദുവിനെ കൂടാതെ ബനശ്രീ മൈത്തി (കാന്തി നോർത്ത്​​), ശീൽഭ​ദ്ര ദത്ത (ബാരക്ക്​​പുർ), ബിശ്വജിത്​ കുണ്ഡു (കൽന), സുക്ര മുണ്ഡ (നഗ്രകട), സൈകത്​ പഞ്​ജ (മോണ്ഡേശ്വർ) എന്നിവരാണ്​ ബി.ജെ.പിയിലെത്തിയ തൃണമൂൽ എം.എൽ.എമാർ.

2016ൽ ഗസോൾ മണ്ഡലത്തിൽനിന്ന്​ സി.പി.എം ടിക്കറ്റിൽ വിജയിച്ച ശേഷം 2018ൽ തൃണമൂലിൽ ചേർന്ന ദീപാലി ബിശ്വാസ്,​ ഹാൽദിയ സി.പി.എം എം.എൽ.എ തപസി മണ്ഡൽ, തംലൂക്​ സി.പി.ഐ എം.എൽ.എ അശോക്​ ദിണ്ഡ, പുരുലിയ കോൺഗ്രസ്​ എം.എൽ.എ സുദീപ്​ മുഖർജി എന്നിവരും ഷായുടെ റാലിയിൽ ബി.ജെ.പിയിൽ ചേർന്നു. ദീപാലി ബിശ്വാസ് ഇതുവരെ സി.പി.എം എം.എൽ.എ സ്ഥാനം രാജിവെച്ചിട്ടില്ല. ടി.എം.സി മുൻ എം.പി ദശരഥ്​ ടിർക്കിയും ബി.ജെ.പിയിലെത്തി. മുൻ മന്ത്രി ശ്യാമപ്രസാദ്​ മുഖർജി അടക്കം സി.പി.എം, കോൺഗ്രസ്​, തൃണമൂൽ പാർട്ടികളിലെ പല ജില്ല തല നേതാക്കന്മാരും ബി.ജെ.പിയിൽ ചേർന്നിട്ടുണ്ട്​.

മുൻ മന്ത്രികൂടിയായ സുവേന്ദു അധികാരി 2011ൽ മമത ബാനർജിയെ അധികാരത്തിലേറ്റാൻ സഹായിച്ച നന്ദിഗ്രാം സമരത്തിന്​ നേതൃത്വം കൊടുത്തയാളാണ്​. മമതയുടെ വലംകൈയായിരുന്ന മുകുൾ റോയി ശാരദ ചിട്ടിത്തട്ടിപ്പ്​ അടക്കം കേസുകളിൽപ്പെട്ടതിനെ തുടർന്ന്​ ബി.ജെ.പിയിൽ ചേക്കേറിയപ്പോൾ തൃണമൂലിൽ രണ്ടാമനായിരുന്നു​ സു​േവന്ദു. മമതയുടെ ഉറ്റ ബന്ധുവും ഡയമണ്ട്​ ഹാർബർ എം.പിയുമായ അഭിഷേക്​ ബാനർജി, തെരഞ്ഞെടുപ്പ്​ വിദഗ്​ധൻ പ്രശാന്ത്​ കിഷോർ എന്നിവർക്ക്​ പാർട്ടിയിൽ സ്വാധീനമേറിയതാണ്​​ സുവേന്ദുവി​െൻറ മനംമാറ്റത്തിന്​ കാരണമായത്​. സുവേന്ദു കഴിഞ്ഞ വ്യാഴാഴ്​ച എം.എൽ.എ സ്ഥാനം രാജിവെച്ചെങ്കിലും സ്​പീക്കർ ഇതുവരെ സ്വീകരിച്ചിട്ടില്ല.

വരുന്ന തെരഞ്ഞെടുപ്പിൽ ബംഗാളിൽ ബി.ജെ.പി അധികാരത്തിലേറുമെന്ന്​ റാലിയിൽ അമിത്​ ഷാ പറഞ്ഞു. ഇവിടെ താൻ കാണുന്ന ചുഴലിക്കാറ്റ്,​ തെരഞ്ഞെടുപ്പ്​ അടുക്കു​േമ്പാഴേക്കും മമതയെ ഒറ്റപ്പെടുത്തും. തൃണമൂലിനെ പിളർത്താൻ ബി.ജെ.പി ശ്രമിക്കുന്നുവെന്നാണ്​ ദീദിയുടെ ആരോപണം. തൃണമൂൽ നിങ്ങളുടെ യഥാർഥ പാർട്ടിയാണോ, അതോ കോൺഗ്രസ്​ പിളർത്തി ഉണ്ടാക്കിയതാണോ? എന്നാണ്​ അവരോട്​ ചോദിക്കാനുള്ളത്​ -അമിത്​ ഷാ പറഞ്ഞു.

അടുത്ത നിയമസഭ തെരഞ്ഞെടുപ്പിൽ തൃണമൂൽ കോൺഗ്രസ്​ സംസ്ഥാനത്ത്​ രണ്ടാമതാകുമെന്ന്​ പറഞ്ഞ സുവേന്ദു അധികാരി തൃണമൂൽ വ്യക്തികേന്ദ്രീകൃത പാർട്ടിയായെന്നും കുറ്റപ്പെടുത്തി.