സോഹൻ-മോഹൻ സയാമീസ് ഇരട്ടകൾക്ക് ഇനിമുതൽ രണ്ട് വോട്ടർ ഐ.ഡി

അമൃത്സർ: അടുത്തിടെ വാർത്തകളിൽ നിറഞ്ഞു നിന്ന അമൃത്സറിലെ സോഹൻ, മോഹൻ സയാമീസ് ഇരട്ട സഹോദരങ്ങൾക്ക് വെവ്വേറെ വോട്ടർ ഐ.ഡികൾ കൈമാറി. രണ്ടുപേർക്കുമായി ഒറ്റ തിരിച്ചറിയൽ കാർഡ് മാത്രമാണ് ഉള്ളതെന്ന് മുൻപ് വാർത്തകൾ വന്നിരുന്നു.

കഴിഞ്ഞ വർഷം 18 വയസ്സ് തികഞ്ഞ ഈ സഹോദരങ്ങൾക്ക് 12-ാമത് ദേശീയ വോട്ടേഴ്‌സ് ദിനത്തോടനുബന്ധിച്ച് പഞ്ചാബ് ചീഫ് ഇലക്ടറൽ ഓഫിസർ ഡോ. എസ്. കരുണരാജുവാണ് ഐ.ഡി കൈമാറിയത്.

വോട്ടിങ്ങിനായി രണ്ട് പേർക്കും പ്രത്യേക ക്രമീകരണങ്ങൾ ഏർപ്പെടുത്തുമെന്നും, അതിലൂടെ ഇരുവർക്കും വെവ്വേറെ വോട്ടുചെയ്യാനും, അവരുടെ സ്വകാര്യത നിലനിർത്താനും കഴിയുമെന്നും ഡോ. ​​രാജു പറഞ്ഞു.

സോഹനെയും മോഹനനെയും വെവ്വേറെ വോട്ടർമാരായി കണക്കാക്കി തെരഞ്ഞെടുപ്പ് കമീഷൻ ഇരുവർക്കും വ്യക്തിഗത വോട്ടിങ്ങിന് അവകാശം നൽകിയിരുന്നു. രാജ്യത്തെ മുഴുവൻ വോട്ടർമാരെയും തെരഞ്ഞെടുപ്പിൽ ഉൾപ്പെടുത്തുക, വോട്ടെടുപ്പിന്‍റെ ഭാഗമാക്കുക എന്നതാണ് ഈ വർഷത്തെ ദേശീയ വോട്ടേഴ്‌സ് ദിനത്തിന്റെ പ്രമേയം.