പാർലമെൻറിൽ ഒരു ഉദ്യോഗസ്​ഥന്​ കൂടി കോവിഡ്​; രണ്ട്​ നിലകൾ അടച്ചിട്ടു

ന്യൂഡൽഹി: പാർലമ​െൻറ്​ സമുച്ചയത്തിൽ ഉന്നത ഉദ്യോഗസ്​ഥന്​ കൂടി കോവിഡ്​ സ്​ഥിരീകരിച്ചു. മേയ് 28ന് ജോലിയിലുണ്ടായിരുന്ന ഡയറക്ടർ തസ്​തികയിലുള്ള ഓഫിസർക്കും കുടുംബാംഗങ്ങൾക്കുമാണ്​ വൈറസ്​ ബാധ കണ്ടെത്തിയത്​. ഇതേത്തുടർന്ന്​ അദ്ദേഹത്തി​​െൻറ ഓഫിസ്​ സ്​ഥിതിചെയ്യുന്ന പാർലമ​െൻറിലെ രണ്ട്​ നിലകൾ അടച്ചിട്ടു.

പാർലമ​െൻറിൽ ഇതുവരെ റിപ്പോർട്ട് ചെയ്ത നാലാമത്തെ കോവിഡ്​ കേസാണിത്​. മേയ് മൂന്നിന് പാർലമ​െൻറ്​ പ്രവർത്തനം പുനരാരംഭിച്ച ശേഷമാണ്​ നാലുപേർക്കും രോഗം കണ്ടെത്തിയത്​. മാർച്ച് 23ന് ബജറ്റ് സെഷൻ മാറ്റിവച്ചതു മുതൽ വീട്ടിൽ കഴിയുകയായിരുന്ന ഹൗസ്​ കീപ്പിങ്​ വിഭാഗം ​ജീവനക്കാരനാണ്​ ആദ്യമായി കോവിഡ്​ ബാധിച്ചത്. സുരക്ഷാ ഉദ്യോഗസ്ഥനാണ്​ മറ്റൊരാൾ. എഡിറ്റോറിയൽ ആൻഡ്​ ട്രാൻസ്​ലേഷൻ (ഇ ആൻഡ് ടി) വിഭാഗത്തിൽ പ്രവർത്തിക്കുന്ന ഉദ്യോഗസ്ഥനും രോഗം സ്​ഥിരീകരിച്ചിരുന്നു. 

വെള്ളിയാഴ്​ച നാലാമത്തെയാൾക്കും രോഗം കണ്ടെത്തിയതോടെ കെട്ടിടങ്ങളും പരിസരവും അധികൃതർ അണുവിമുക്​തമാക്കി. ശക്​തമായ മുൻകരുതൽ നടപടികളും കൈക്കൊള്ളുന്നുണ്ട്​. വിശദപരിശോധനക്ക്​ ശേഷം മാത്രമേ ജീവനക്കാർക്ക് പാർലമ​െൻറിൽ പ്രവേശിക്കാൻ അനുവാദമുള്ളൂ. സമുച്ചയത്തിലേക്ക് പ്രവേശിക്കുന്നതിന് മുമ്പ് വാഹനങ്ങളും അണുവിമുക്​തമാക്കും.

പാർലമ​െൻറിലും സമീപ കെട്ടിടങ്ങളിലും ജോലി ചെയ്യുന്ന ചില ജീവനക്കാർക്കും കോവിഡ്​ ലക്ഷണം ഉള്ളതായി ഇന്ത്യ ടി.വി റിപ്പോർട്ട്​ ചെയ്​തു. പാർലമ​െൻറ്​ സമുച്ചയത്തിന് സമീപം കൃഷി ഭവൻ, ശാസ്ത്രി ഭവൻ, നിതി ആയോഗ് തുടങ്ങി നിരവധി ഓഫിസുകളുണ്ട്.