'മാപ്പ്' മാറിയതിന് തരൂരിന്റെ മാപ്പ്; പിശകിന്​ നിരുപാധികം ക്ഷമ ചോദിക്കുന്നു -തരൂർ

ന്യൂഡൽഹി: നാമനിർദേശ പത്രികക്കൊപ്പം നൽകിയ പ്രകടന പത്രികയിലെ ഇന്ത്യയുടെ ഭൂപടം കോൺഗ്രസ്​ പ്രസിഡന്‍റ്​ സ്ഥാനാർഥി ശശി തരൂരിനെ വെട്ടിലാക്കി. ജമ്മുകശ്​മീരിന്‍റെ ചില ഭാഗങ്ങൾ ഇല്ലാത്ത ഭൂപടമാണ്​ പ്രകടന ​പത്രികക്കൊപ്പം ചേർത്തതെന്ന്​ തിരിച്ചറിഞ്ഞ തരൂർ പിന്നീട്​ അച്ചടി പിശകിന്​ നിരുപാധികം മാപ്പു പറഞ്ഞു.

കോൺഗ്രസിൽ വികേന്ദ്രീകരണം നടക്കണമെന്നും കീഴ്​ഘടകങ്ങൾക്ക്​ കൂടുതൽ പ്രവർത്തനാധികാരം നൽകണമെന്നും നിർദേശിക്കുന്ന വമ്പൻ പ്രകടന പത്രികയാണ്​ തരൂർ തയാറാക്കിയത്​. അതിനൊപ്പമുള്ള ഭൂപടത്തിലെ തെറ്റ്​ ടി.വി ചാനലുകളിലെ ചിത്രങ്ങളിൽ നിന്ന്​ മനസിലാക്കിയ ബി.ജെ.പി വിഷയം ഏറ്റെടുത്തു. സ്ഥാനാർഥിയായ തരൂരിന്​ മാത്രമേ ഇക്കാര്യത്തിൽ എന്തെങ്കിലും പറയാൻ കഴിയൂ എന്ന പരാമർശത്തോടെ കോൺഗ്രസ്​ ഒഴിഞ്ഞു മാറി. ഇതിനു പിന്നാലെയാണ്​ തരൂർ സമൂഹ മാധ്യമങ്ങളിൽ മാപ്പു പറഞ്ഞത്​.