കാർഷിക നിയമങ്ങൾ പിൻവലിക്കാനുള്ള മോദിയുടെ നീക്കത്തിന്​ പിന്നിൽ നിയമസഭ തെരഞ്ഞെടുപ്പുകളോ ?

അഞ്ച്​ സംസ്ഥാനങ്ങളിൽ തെരഞ്ഞെടുപ്പ്​ നടക്കാനിരിക്കെയാണ്​ വിവാദമായ ​ കാർഷിക നിയമങ്ങൾ പിൻവലിക്കാനുള്ള തീരുമാനം പ്രധാനമന്ത്രി നരേന്ദ്ര മോദി പ്രഖ്യാപിച്ചത്​. ഉത്തർപ്രദേശ്​, ഉത്തരാഖണ്ഡ്​, ഗോവ, പഞ്ചാബ്​, മണിപ്പൂർ സംസ്ഥാനങ്ങളിലേക്കാണ്​ തെരഞ്ഞെടുപ്പ്​ നടക്കുന്നത്​​. ഇതിൽ യു.പിയിലും പഞ്ചാബിലും നടക്കുന്ന തെരഞ്ഞെടുപ്പുകളിൽ നേട്ടമുണ്ടാക്കേണ്ടത്​ ബി.ജെ.പിയെ സംബന്ധിച്ചിടത്തോളം അനിവാര്യമാണ്​. ഇതു കൂടി ലക്ഷ്യംവെച്ചാണ്​​ കാർഷിക നിയമങ്ങൾ പിൻവലിക്കാൻ ബി.ജെ.പി ഇപ്പോൾ തയാറായിരിക്കുന്നത്​.

നവംബർ ഏഴിന്​ ബി.ജെ.പിയുടെ ദേശീയ എക്​സിക്യൂട്ടീവ്​ യോഗം ​നടന്നിരുന്നു. അഞ്ച്​ സംസ്ഥാനങ്ങളിലേക്ക്​ നടക്കുന്ന തെരഞ്ഞെടുപ്പായിരുന്നു യോഗത്തിലെ പ്രധാന ചർച്ച വിഷയം. ഉത്തർപ്രദേശ്​, ഉത്തരാഖണ്ഡ്​, ഗോവ, മണിപ്പൂർ തുടങ്ങിയ ബി.ജെ.പി ഭരിക്കുന്ന സംസ്ഥാനങ്ങളിലെ മുഖ്യമന്ത്രിമാരും യോഗത്തിനെത്തിയിരുന്നു. ​കാർഷിക നിയമങ്ങൾക്കെതിരായ പ്രതിഷേധം തെരഞ്ഞെടുപ്പിനെ ഏത്​ തരത്തിൽ സ്വാധീനിക്കുമെന്ന്​ യോഗം ചർച്ച ചെയ്​തുവെന്നാണ്​ വിവരം. ഇതിന്​ പിന്നാലെ ധനമന്ത്രി നിർമല സീതാരാമൻ കർഷകരുമായി ഏത്​ തരത്തിലുമുളള ചർച്ചകൾക്കും തയാറാണെന്ന്​ പ്രഖ്യാപിച്ചത്​.

എന്നാൽ, ഡൽഹിയിൽ സമരം നടത്തുന്ന കർഷകർ ഇതിനോട്​ അനുകൂലമായി​ പ്രതികരിച്ചില്ല. തുടർന്ന്​ തെരഞ്ഞെടുപ്പ്​ മുന്നിൽകണ്ട്​ കർഷകർക്ക്​ വേണ്ടി വലിയ പ്രഖ്യാപനങ്ങളുണ്ടാവുമെന്ന്​ റിപ്പോർട്ടുണ്ടായിരുന്നു. എന്നാൽ, വൻ വാഗ്​ദാനങ്ങൾ നൽകി തെരഞ്ഞെടുപ്പിനെ നേരിടുകയെന്ന ചൂതാട്ടത്തിന്​ നിൽക്കാതെ നിരുപാധികം കർഷകർക്ക്​ മുന്നിൽ കീഴടങ്ങിയിരിക്കുകയാണ്​ മോദി സർക്കാർ ഇപ്പോൾ ചെയ്​തിരിക്കുന്നത്​.

തെരഞ്ഞെടുപ്പ്​ നടക്കുന്ന യു.പിയിലെ ലഖിംപൂർ ഖേരിയിൽ നാല്​ കർഷകർ ഉൾപ്പടെ എട്ട്​ പേർ കൊല്ലപ്പെട്ടത്​ യോഗി സർക്കാറിനെതിരെ വലിയ പ്രതിഷേധമുണ്ടാവുന്നതിന്​ വഴിവെച്ചിരുന്നു. കേസിൽ ആരോപണവിധേയനായത്​ കേന്ദ്രമന്ത്രിയും അദ്ദേഹത്തിന്‍റെ മകനുമാണെന്നത്​ ബി.ജെ.പി പ്രതിസന്ധിയുടെ ആക്കം കൂട്ടി.

അതിർത്തിയിൽ സമരം നടത്തുന്ന കർഷക സംഘടനകൾ ബി.ജെ.പിക്കെതിരെ യു.പിയിൽ പ്രചാരണത്തിനെത്തുമെന്ന്​ കൂടി അറിയിച്ചതോടെ പാർട്ടി കടുത്ത സമ്മർദത്തിലേക്ക്​ വീണു. അഭിമാനപോരാട്ടം നടക്കുന്ന യു.പിയിൽ ബി.ജെ.പിക്ക്​ തിരിച്ചടിയുണ്ടാവുമെന്ന പ്രവചനങ്ങൾ വരുന്നതിനിടെയാണ്​ കാർഷിക നിയമങ്ങൾ പിൻവലിക്കാനുള്ള തീരുമാനം പ്രധാനമന്ത്രി പ്രഖ്യാപിച്ചത്​. ഇത്​ തെരഞ്ഞെടുപ്പിനെ സ്വാധീനിക്കുമെന്ന്​ തന്നെയാണ്​ ബി.ജെ.പിയുടെ പ്രതീക്ഷ. യു.പിക്ക്​ അടുത്ത്​ കിടക്കുന്ന ഉത്തരാഖണ്ഡിലും വിവാദ നിയമങ്ങളും പ്രതിഷേധവും ചർച്ചയാകുമെന്ന്​ ഉറപ്പാണ്​.

അതേസമയം, പഞ്ചാബിൽ ബി.ജെ.പി വലിയ പ്രതീക്ഷ വെച്ചുപുലർത്തിയിരുന്നില്ല. എന്നാൽ, കോൺഗ്രസ്​ നേതൃവുമായി തെറ്റി അമരീന്ദർ സിങ്​ പാർട്ടി വിട്ടതോടെ ഒരു കൈ അവിടെയും നോക്കാമെന്ന നിലപാടിലേക്ക്​ ബി.ജെ.പി നേതൃത്വം എത്തി. അമരീന്ദറിനെ പാളയത്തിലെത്തിച്ച്​ തെരഞ്ഞെടുപ്പിന്​ സജ്ജമാകാമെന്നായിരുന്നു ബി.ജെ.പിയുടെ കണക്കു കൂട്ടൽ. അമിത്​ ഷായെ പോലുള്ള നേതാക്കൾ അമരീന്ദറുമായി ചർച്ച നടത്തുകയും ചെയ്​തു. എന്നാൽ, കാർഷിക നിയമങ്ങൾ പിൻവലിക്കാതെ ബി.ജെ.പി പക്ഷത്തേക്കില്ലെന്ന്​​ അമരീന്ദർ കട്ടായം പറഞ്ഞതോടെ പാർട്ടിക്ക്​ മുന്നിൽ ആ സാധ്യത താൽകാലികമായി അടഞ്ഞിരുന്നു.

എന്നാൽ, കാർഷിക നിയമങ്ങൾ പിൻവലിക്കാനുള്ള തീരുമാനം ബി.ജെ.പിക്ക്​ പഞ്ചാബിൽ പുതിയ സാധ്യതകൾ തുറന്നിടും. വരും ദിവസങ്ങളിൽ അമരീന്ദർ സിങ്​ സ്വീകരിക്കുന്ന നിലപാടാവും ഇക്കാര്യത്തിൽ നിർണായകമാവുക. തെരഞ്ഞെടുപ്പ്​ നടക്കുന്ന ഗോവയിലും മണിപ്പൂരിലും കാർഷിക നിയമങ്ങളും കർഷക പ്രതിഷേധവും സ്വാധീനം ചെലുത്തുമെന്നുറപ്പാണ്​.