ഡിഡി ഫ്രീഡിഷിൽ നുഴഞ്ഞുകയറി അർണബിന്‍റെ റിപ്പബ്ലിക്​ ടി.വി; സർക്കാറിന്​ പണം ഒടുക്കിയില്ല

മുംബൈ: പ്രസാർഭാരതിയുടെ ഉടമസ്​ഥതയിലുള്ള ഡി.ടി.എച്ച്​ സംവിധാനമായ ഡിഡി ഫ്രീഡിഷിൽ നുഴഞ്ഞുകയറി അർണബ്​ ഗോസ്വാമിയുടെ റിപ്പബ്ലിക്​ ടി.വി. 2017 മേയിൽ ആരംഭിച്ച ചാനൽ ഇ​ത്രയുംകാലം പണം നൽകാതെയാണ്​ ഡിഡി ഫ്രീഡിഷിൽ പ്രദർശിപ്പിച്ചിരുന്നത്​. വർഷത്തിൽ 8-12 കോടിരൂപയാണ്​ ഡിഡി ഫ്രീഡിഷിൽ ഒരു ചാനൽ പ്രദർശിപ്പിക്കാൻ വാടകയായി നൽകേണ്ടത്​. ഏകദേശം 25 കോടിയുടെ നഷ്​ടം ഇതുമൂലം പ്രസാർഭാരതിക്ക്​ ഉണ്ടായതായാണ്​ കണക്കാക്കുന്നത്​.

ഇതുസംബന്ധിച്ച്​ കേന്ദ്ര വാർത്താവിതരണ മന്ത്രാലയത്തിന്​ മറ്റ്​ ചാനലുകൾ പരാതി നൽകിയെങ്കിലും നടപടി എടുത്തില്ലെന്നും ആരോപണമുണ്ട്​. 2019 സെപ്​റ്റംബർ വരെ അനധികൃതമായി ഡിഡി ഫ്രീഡിഷിൽ റിപ്പബ്ലിക്​ ടി.വി പ്രദർശിപ്പിച്ചു. നിലവിൽ ടി.ആർ.പി തട്ടിപ്പ്​വാർത്ത പുറത്തുവന്നതോടെയാണ്​ പ്രശ്​നം വീണ്ടും ചർച്ചയായത്​.അർണബ്​ ഗോസ്വാമിയും ടെലിവിഷൻ റേറ്റിങ്​ കമ്പനിയായ ബാർക്​ സി.ഇ.ഒയ​ും തമ്മിലുള്ള വാട്​സ്​ആപ്പ്​ ചാറ്റുകളിൽ ഡി.ടി.എച്ചിൽ നുഴഞ്ഞുകയറിയ വിഷയവും പരാമർശിക്കുന്നുണ്ട്​. റിപ്പബ്ലിക്​ ടി.വിയെപറ്റി ചില പരാതികൾ വാർത്താവിതരണ പ്രക്ഷേപണ മന്ത്രാലയത്തിന്​ മുന്നിലുണ്ടെന്നാണ്​ പാർത്തോദാസ്​ ഗുപ്​ത വാട്​സാപ്പ്​ ചാറ്റിൽ അർണബിനോട്​ പറയുന്നത്​.

മന്ത്രാലയത്തിലെ ജോയിന്‍റ്​ സെക്രട്ടറി വഴിയാണ്​ തനിക്കീ വിവരം ലഭിച്ചതെന്നും പാർത്തോദാസ്​ പറയുന്നു​. ഇതിനുമറുപടിയായി അർണബ്​ പറയുന്നത്​ ഈ വിവരം പുറത്തുവിടാതെ സൂക്ഷിച്ചിട്ടുള്ളതായാണ്​ തന്നോട്​ രാത്തോഡ്​ പറഞ്ഞതെന്നാണ്​. അർണബ്​ പറയുന്ന രാത്തോഡ്​​ കേന്ദ്ര മന്ത്രിയായിരുന്ന രാജ്യവർധൻ സിങ്​ രാത്തോഡ്​ ആണെന്നാണ്​ സൂചന.