ചെന്നൈ ഇരട്ട കൊലപാതകം: പ്രതികൾ അറസ്റ്റിൽ, 9 കിലോ സ്വർണവും 70 കിലോ വെള്ളിയും പിടിച്ചെടുത്തു

ചെന്നൈ: നഗരത്തെ നടുക്കിയ ഇരട്ടകൊലപാതക- കൊള്ള കേസിൽ പ്രതികൾ പിടിയിൽ. വ്യവസായിയും ബിസിനസുകാരനുമായ ചെന്നൈ മൈലാപ്പൂർ വൃന്ദാവൻ നഗർ ദ്വാരക കോളനി ശ്രീകാന്ത്​ (60), ഭാര്യ അനുരാധ (55) എന്നിവരാണ്​ കൊലപ്പെട്ടത്​. ഇവരുടെ കുടുംബ ​ൈഡ്രവർ കൃഷ്ണ (45), സുഹൃത്ത്​ രവി (50) എന്നിവരാണ്​ പ്രതികൾ.

മകൾ സുനന്ദയുടെ പ്രസവത്തോടുബന്ധിച്ച്​ മാർച്ചിലാണ്​ ദമ്പതികൾ അമേരിക്കയിലേക്ക്​ പോയത്​. ശനിയാഴ്ച പുലർച്ചെ മൂന്നരയോടെ ചെന്നൈയിൽ തിരിച്ചെത്തി. കൃഷ്​ണയാണ്​ ഇവരെ വിമാനത്താവളത്തിൽനിന്ന്​ കാറിൽ മൈലാപ്പൂരി​ലെ വീട്ടിലേക്ക്​ വിളിച്ചുകൊണ്ടുവന്നത്​. പിന്നീട്​ സുഹൃത്ത്​ രവിയുമായി ചേർന്ന്​ ഇരുവരെയും അടിച്ചു കൊലപ്പെടുത്തുകയുമായിരുന്നു. മൃതദേഹങ്ങൾ ചാക്കിലാക്കി കാറിൽ കയറ്റി ശ്രീകാന്തിന്‍റെ നെമിലിച്ചേരിയിലെ ഫാം ഹൗസിൽ കൊണ്ടുപോയി കുഴിച്ചുമൂടി. തുടർന്ന്​ കൊള്ളയടിക്കപ്പെട്ട ഒൻപത്​ കിലോ സ്വർണവും 70 കിലോ വെള്ളിയുമായി പ്രതികൾ കാറിൽ രക്ഷപ്പെടുകയായിരുന്നു.

ശനിയാഴ്ച ഉച്ചയോടെയാണ്​ കൊലപാതക വിവരം പുറത്തായത്​. തുടർന്ന്​ നടത്തിയ അന്വേഷണത്തിൽ ശനിയാഴ്ച വൈകീട്ട്​ ആറരയോടെ ആന്ധ്രയിൽവെച്ചാണ്​ പ്രതികൾ പിടിയിലായത്​. മൊബൈൽഫോൺ സിഗ്​നലുകളുടെ അടിസ്ഥാനത്തിൽ ആന്ധ്ര പൊലീസിന്‍റെ സഹായ​ത്തോടെയാണ്​ പ്രതികളെ പിടികൂടിയതെന്ന്​ ​സൗത്ത്​ ചെന്നൈ സിറ്റി അഡിഷനൽ പൊലീസ്​ കമീഷണർ കണ്ണൻ അറിയിച്ചു. തൊണ്ടിസാധനങ്ങളും കണ്ടെടുത്തു. ഞായറാഴ്ച ഫാംഹൗസിൽ കുഴിച്ചിട്ട മൃതദേഹങ്ങൾ പൊലീസ്​ പുറത്തെടുത്ത്​ ഇൻക്വസ്റ്റ്​ നടത്തി പോസ്റ്റുമോർട്ടം നടത്തി.

പ്രതികൾ നേപ്പാളിലേക്ക്​ കടക്കാനായിരുന്നു പരിപാടിയെന്ന്​ ചോദ്യംചെയ്യലിൽ അറിവായി. കൃഷ്ണയുടെ പിതാവ്​ ശ്രീകാന്തിന്‍റെ ഫാംഹൗസിലെ കാവൽക്കാരനായി ജോലി ചെയ്​തിരുന്നു. ഇൗ നിലയിലാണ്​ വിശ്വസ്തനെന്ന നിലയിൽ മകൻ കൃഷ്ണയെ കുടുംബ ഡ്രൈവറായി നിയോഗിച്ചത്​.