'കലാപരമായി തയാറാക്കിയ പ്രകടനം'; പ്രധാനമന്ത്രി പാർലമെൻറിൽ കണ്ണീർ പൊഴിച്ചതിനെ ട്രോളി ശശി തരൂർ

ന്യൂഡൽഹി: രാജ്യസഭയിൽകോൺഗ്രസ്​ നേതാവ്​ ഗുലാംനബി ആസാദി​ന്​ യാത്രയയപ്പ്​ നൽകവെ വികാരാധീനനായി കണ്ണീർ പൊഴിച്ച പ്രധാനമന്ത്രി നരേന്ദ്രമോദിയെ ​ട്രോളി കോൺഗ്രസ്​ നേതാവ്​ ശശി തരൂർ എം.പി. 'കലാപരമായി തയാറാക്കിയ പ്രകടനം' എന്നാണ്​ തരൂൾ ഇതേക്കുറിച്ച്​ പറഞ്ഞത്​.

മുൻ ഉപരാഷ്​ട്രപതി ഹാമിദ്​ അൻസാരിയുടെ 'ബൈ മെനി എ ഹാപ്പി ആക്​സിഡൻറ്​: റീകലക്ഷൻസ്​ ഓഫ്​ എ ലൈഫ്​' എന്ന പുസ്​തകത്തെ കുറിച്ചുള്ള ചർച്ചയിൽ പ​ങ്കെടുക്കവെയാണ്​ തരൂർ പ്രധാനമന്ത്രിയുടെ പ്രസംഗത്തെ കുറിച്ച്​ അഭിപ്രായപ്പെട്ടത്​.

''അതൊരു കലാപരമായി തയാറാക്കിയ പ്രകടനമായിരുന്നു. ടികായത്തി​െൻറ കണ്ണൂനീരിനോടുള്ള ഭാഗിക പ്രതികരണമായി തനിക്കും കണ്ണുനീരു​ണ്ടെന്ന്​ കാണിക്കാൻ ​തീരുമാനിക്കുകയായിരുന്നു അദ്ദേഹം.'' -തരൂർ പറഞ്ഞു.

ഗാസിയാപൂർ അതിർത്തിയിൽ നടന്നു​കൊണ്ടിരിക്കുന്ന കർഷക പ്രതിഷേധത്തെ കുറിച്ച്​ പറയവെ കർഷക നേതാവ്​ രാകേഷ്​ ടികായത്ത്​ കണ്ണുനീർ പൊഴിച്ചിരുന്നു.

ചൊവ്വാഴ്​ച രാജ്യസഭയിൽ ഗുലാം നബി ആസാദിന്​ യാത്രയയപ്പ്​ നൽകവെ സംസാരിച്ച മോദി അദ്ദേഹവുമായുണ്ടായിരുന്ന ബന്ധത്തെ കുറിച്ച്​ പറഞ്ഞുകൊണ്ടാണ്​​ പല തവണ വികാരാധീനനായത്​. താൻ ഗുജേറാത്ത്​ മുഖ്യമന്ത്രിയും ഗുലാം നബി ആസാദ്​ കശ്​മീർ മുഖ്യമന്ത്രിയുമായിരുന്നപ്പോൾ തങ്ങൾ ബന്ധ​​പ്പെടാറുണ്ടായിരുനനുവെന്ന്​ പ്രധാനമ​ന്ത്രി പറഞ്ഞിരുന്നു.

കശ്​മീരിൽ ഭീകരാക്രമണമുണ്ടായപ്പോൾ ചില ഗുജറാത്തി തീർഥാടകർ അവിടെ അകപ്പെട്ടു പോയതായും അക്കാര്യം തന്നെ ആദ്യം വിളിച്ചറിയിച്ചത്​ ആസാദ്​ ആയിരുന്നുവെന്നും അദ്ദേഹത്തിന്​ കരച്ചിലടക്കാൻ സാധിച്ചിരുന്നില്ലെന്നുംപറഞ്ഞാണ്​ മോദി വികാരാധീനനായത്​.