വിരമിച്ചാൽ ഏത് പദവിയാണ് കാത്തിരിക്കുന്നത്? - തെരഞ്ഞെടുപ്പ് കമീഷണറെ രൂക്ഷമായി വിമർശിച്ച് കെജ്രിവാൾ

ന്യൂഡൽഹി: തെരഞ്ഞെടുപ്പ് കമീഷണർ രാജീവ് കുമാറിനെതിരെ ആഞ്ഞടിച്ച് എ.എ.പി ദേശീയ കൺവീനർ അരവിന്ദ് കെജ്രിവാൾ. വിരമിച്ച ശേഷം ലഭിക്കുന്ന പദവി സ്വപ്നം കണ്ട് രാജീവ് കുമാർ ബി.ജെ.പിക്ക് കീഴടങ്ങിയിരിക്കുകയാണെന്നായിരുന്നു വിമർശനം. ഡൽഹി ​നിയമസഭ തെരഞ്ഞെടുപ്പ് പ്രചാരണത്തിലായിരുന്നു കെജ്രിവാളിന്റെ വിമർശനം. സ്ഥാനത്തോടുള്ള ആഗ്രഹം മാറ്റിവെച്ച് ​തെരഞ്ഞെടുപ്പ് കമീഷണർ അദ്ദേഹത്തി​ന്റെ ജോലി ചെയ്യണമെന്നും ഡൽഹി മുൻ മുഖ്യമന്ത്രി ആവശ്യപ്പെട്ടു.

​''ഈ മാസാവസാനം രാജീവ് കുമാർ വിരമിക്കുകയാണ്. വിരമിച്ചതിനു ശേഷം അദ്ദേഹത്തിന് വാഗ്ദാനം നൽകിയിരിക്കുന്ന പോസ്റ്റ് ഏതാണ്. ഗവർണറുടെ​താണോ അതോ പ്രസിഡന്റിന്റേതാണോ? ബി.ജെ.പിക്ക് മുന്നിൽ സമ്പൂർണമായി കീഴടങ്ങിയിരിക്കുകയാണ് തെരഞ്ഞെടുപ്പ് കമീഷണർ. തെരഞ്ഞെടുപ്പ് കമീഷൻ ഉണ്ടെന്നു പോലും ആളുകൾക്ക് മനസിലാകുന്നില്ല.''-കെജ്രിവാൾ വാർത്താസമ്മേളനത്തിൽ പറഞ്ഞു.

രാജീവ് കുമാറിനോട് വിനീതമായി അഭ്യർഥിക്കുകയാണ്. ഒരു പദവിയും ആഗ്രഹിക്കാതെ നിങ്ങൾ നിങ്ങളുടെ ജോലി ഭംഗിയായി നിർവഹിക്കണം. നിങ്ങളുടെ കരിയറിന്റെ അവസാനമായിരിക്കുകയാണ്. രാജ്യത്തെയും രാജ്യത്തിലെ ജനാധിപത്യത്തെയും തകർക്കരുതെന്ന് വനീതമായി അപേക്ഷിക്കുകയാണ്.-കെജ്രിവാൾ ആവശ്യപ്പെട്ടു.

തന്റെ എതിരാളിയായി മത്സരിക്കുന്ന ബി.ജെ.പി സ്ഥാനാർഥി പർവേശ് വർമ പണം വാരിയെറിഞ്ഞ് വോട്ടർമാരെ സ്വാധീനിക്കുകയാണെന്നും ഇക്കാര്യത്തിൽ തെരഞ്ഞെടുപ്പ് കമീഷൻ ഒരുനടപടിയും സ്വീകരിക്കാതെ നിർജീവമായി നിലകൊള്ളുകയാണെന്നും കെജ്രിവാൾ ആരോപിച്ചിരുന്നു.