ആര്യൻ ഖാന് ജാമ്യം ലഭിക്കാൻ അഭിഭാഷകർ ഉന്നയിച്ച വാദങ്ങൾ ഇതാണ്​​

മുംബൈ: മയക്കുമരുന്ന്​ കേസിൽ ബോളിവുഡ്​ താരം ഷാരൂഖ്​ ഖാന്‍റെ മകൻ ആര്യൻ ഖാന്​ ജാമ്യം ലഭിച്ചതിന്​ പിന്നാലെ കോടതിയിൽ ഉയർത്തിയ വാദമുഖങ്ങളെ സംബന്ധിച്ച്​ ​പ്രതികരണവുമായി മുതിർന്ന അഭിഭാഷകൻ സതിഷ്​ മനെഷിണ്ഡേ. കോടതിയിൽ ആര്യൻ ഖാന്​ വേണ്ടി വാദിച്ച ഷി​ണ്ഡേ താരപുത്രനെതിരെ വ്യാജ കേസാണ്​ എടുത്തിട്ടുള്ളതെന്നും പറഞ്ഞു.

ആര്യൻ ഖാനെ അറസ്റ്റ്​ ചെയ്യാൻ മാത്രം ശക്​തമായ കേസല്ല ഇത്​. 20 ദിവസമായി ആര്യൻ ജയിലിലാണ്​. ഒരു കുടുംബവും ഇത്തരമൊരു സാഹചര്യത്തിലൂടെ കടന്ന്​ പോകരുത്​. വാറണ്ടില്ലാത്തതും നിയമവിരുദ്ധവുമായ അറസ്റ്റാണ്​ നടന്നത്​. ഞങ്ങളുടെ വാദങ്ങൾ കോടതി അന്തിമമായി അംഗീകരിച്ചു. ആര്യൻ ഖാന്‍റെ കൈവശം മയക്കുമരുന്ന്​ ഉണ്ടായിരുന്നില്ല. ഒരു തെളിവും ഇല്ലാതെയാണ്​ ആര്യനെതിരെ കേസെടുത്തത്​. വാട്​സാപ്പ്​ ചാറ്റുകൾ കേസിലെ തെളിവായി പരിഗണിക്കാനാവില്ലെന്നും അഭിഭാഷകൻ കൂട്ടിച്ചേർത്തു.

ആര്യനെ വിശദമായി പരിശോധിച്ച​ുവെങ്കിലും എൻ.സി.ബിക്ക്​ ഒന്നും കണ്ടെത്താനായില്ല. കപ്പലിൽ മയക്കുമരുന്ന്​ ഉപയോഗിച്ചവരുമായി ആര്യനെ ബന്ധപ്പെടുത്തുന്ന തെളിവുകളൊന്നും ലഭിച്ചില്ല. എന്തുകൊണ്ടാണ്​ ആര്യൻ അറസ്റ്റ്​ ചെയ്യപ്പെട്ടതെന്ന്​ ഇനിയും വ്യക്​തമല്ല. ആര്യനെ മാത്രം ഉദ്യോഗസ്ഥർ ലക്ഷ്യംവെക്കുകയായിരുന്നുവെന്നും അദ്ദേഹം പറഞ്ഞു.

കേസുമായി ബന്ധപ്പെട്ട്​ ബോംബെ ഹൈകോടതിയിൽ നിന്ന്​ പരാമർശങ്ങൾ പുറത്ത്​ വന്നതിന്​ ശേഷം കൂടുതൽ പ്രതികരണം നടത്താം. കൂട്ടുകാർക്കൊപ്പം കപ്പലിൽ യാത്രക്ക്​ പോയ മകൻ ദിവസങ്ങൾക്ക്​ ശേഷം മടങ്ങി വരുമെന്നാണ്​ ഇവിടെയൊരു കുടുംബം പ്രതീക്ഷിച്ചിരുന്നത്​. എന്നാൽ, മണിക്കൂറുകൾക്കകം മകൻ അറസ്​റ്റിലായെന്ന വാർത്തയാണ്​ അവരെ തേടിയെത്തിയത്​.

ബോളിവുഡ്​ നടി റിയ ചക്രബർത്തി പ്രതിയായ മയക്കുമരുന്ന്​ കേസിലും സതിഷ്​ മനെഷിണ്ഡേയാണ്​ കോടതിയിൽ ഹാജരായത്​. റിയയുടെ കേസിൽ ഒരു വിവരവും ഇതുവരെ പുറത്ത്​ വന്നിട്ടില്ലെന്നും അദ്ദേഹം കൂട്ടിച്ചേർത്തു.