സി.എ.എ വാർത്തയുടെ പേരിൽ മാധ്യമപ്രവർത്തകന്​ ഭീഷണിയുമായി ബി.ജെ.പി മന്ത്രി; അസമിൽ വിവാദം

ഗുവാഹത്തി: അസമിൽ മാധ്യമപ്രവർത്തകനെ അവഹേളിക്കുകയും ഭീഷണിപ്പെടുത്തുകയും ചെയ്​ത ബി.ജെ.പി മന്ത്രിക്കെതിരെ കേസ്​. അസം നിയമസഭ തെരഞ്ഞെടുപ്പിലെ സ്​ഥാനാർഥിയും നഗര വികസനകാര്യ വകുപ്പ്​ മന്ത്രിയുമായ പിയൂഷ്​ ഹസാരികെക്കെതിരെ പ്രതിദിൻ ടൈമിലെ നസറുൽ ഇസ്​ലാമാണ്​ പരാതി നൽകിയത്​.

പ്രതിദിൻ ടൈമിലെ കറസ്​പോണ്ടന്‍റായ നസറുൽ ഇസ്​ലാമിനെ ഹസാരികെ ഭീഷണിപ്പെടുത്തുന്ന ഫോൺ സംഭാഷണത്തിന്‍റെ ഓഡിയോ ക്ലിപ്പ്​ സോഷ്യൽ മീഡിയയിൽ വൈറലായി. ജാഗിറോഡ്​ പൊലീസ്​ സ്​റ്റേഷനിലാണ്​ പരാതി നൽകിയത്​.

ആറ്​ മിനിറ്റ്​ ദൈർഘ്യമുള്ള ക്ലിപ്പിൽ നസറുൽ ഇസ്​ലാമിന്‍റെ കാലുകൾ തല്ലിയൊടിക്കുമെന്നും തെരുവിലൂടെ വലിച്ചിഴക്കുമെന്നും ജാഗിറോഡ്​ മണ്ഡലത്തിൽ നിന്നുള്ള എം.എൽ.എയായ ഹസാരികെ ഭീഷണിപ്പെടുത്തുന്നുണ്ട്​.

അസമിലെ തെരഞ്ഞെടുപ്പ്​ പ്രചാരണ യോഗത്തിൽ ഹസാരികെയുടെ ഭാര്യയും നടിയുമായ ഐമി ബറുവ നടത്തിയ പ്രസംഗം റിപ്പോർട്ട്​ ചെയ്​തതാണ്​ അദ്ദേഹത്തെ ചൊടിപ്പിച്ചത്​. പൗരത്വ ഭേദഗതി നിയമവുമായി ബന്ധപ്പെട്ട്​ ഐമി നടത്തിയ പ്രസംഗം വിവാദമായിരുന്നു.

'പൗരത്വഭേദഗതി നിയമം എന്നതിനെ ലളിതമായി പറഞ്ഞാൽ... ബംഗാളി ഹിന്ദു ജനത നമ്മോടൊപ്പം വളരെക്കാലമായി അസമിൽ കഴിഞ്ഞുവരികയാണ്... ഇവർ സി.‌എ‌.എയെ പിന്തുണച്ചില്ലെങ്കിൽ അവർ അസമിൽ നിന്ന് മാത്രമല്ല ഇന്ത്യയിൽ നിന്നും പുറത്താക്കപ്പെടും. നിങ്ങൾക്ക്​ അസമിലും ഇന്ത്യയിലും താമസിക്കണം. ഞങ്ങൾക്ക് സി‌.എ‌.എ ആവശ്യമാണ്. നിങ്ങൾ ഇവിടെ തന്നെ തുടരണം'-ഇതായിരുന്ന ബംഗാളി ഹിന്ദു ജനവിഭാഗങ്ങൾ നിറഞ്ഞ സദസ്സിന്​ മുമ്പിൽ ബറുവ സംസാരിച്ചത്​.

തന്‍റെ പ്രസ്താവന തെറ്റിദ്ധരിക്കപ്പെട്ടതായും ആരുടെയെങ്കിലും വികാരം വ്രണപ്പെട്ടിട്ടുണ്ടെങ്കിൽ ക്ഷമ ചോദിക്കുന്നതായും ബറുവ പിന്നീട്​ മാധ്യമപ്രവർത്തകരോട് പറഞ്ഞു. ബറുവയുടെ വീഡിയോ റിപ്പോർട്ട്​ ചെയ്യുമ്പോൾ നസറുൽ ഈ ഭാഗം വളച്ചൊടിച്ചതായാണ്​ ഹസാരിക ആരോപിച്ചത്​.

വിഡിയോ പുറത്തുവന്നതിന്​ പിന്നാലെ നസറുൽ ഇസ്​ലാമിനെ വിളിച്ച്​ ബറുവ ഭീഷണിപ്പെടുത്തുകയായിരുന്നു. നസറുൽ ഇസ്​ലാം കോൺഗ്രസ്​-എ.ഐ.ഡി.യു.എഫ്​ സഖ്യവുമായി ചേർന്ന്​ ഗൂഡാലോചന നടത്തുകയായിരുന്നുവെന്നാണ്​ ബറുവ ആരോപിച്ചത്​. നസറുൽ ഇസ്​ലാമിനെ മതത്തിന്‍റെ പേരിൽ അവഹേളിച്ച ബറുവ അദ്ദേഹം മുസ്​ലിം രാഷ്​ട്രീയം കളിക്കുകയാണെന്നും പറഞ്ഞു.