പി.പി.ഇ കിറ്റ്​ വാങ്ങിയതിൽ അഴിമതിയെന്ന്​; അസമിൽ ബി.ജെ.പി സർക്കാറിനെതിരെ കോൺഗ്രസ്​

ഗുവാഹത്തി: അസമിൽ കോവിഡ്​ 19 പ്രതിരോധ സാമഗ്രികൾ വാങ്ങിയതിൽ ഉയർന്ന അഴിമതി ആരോപണം ഉപ ലോകായുക്​ത അന്വേഷിക്കണമെന്ന്​ ​ കോൺഗ്രസ്​. വിവരാവകാശ നിയമപ്രകാരം ലഭിച്ച രേഖകൾ സഹിതമാണ്​ ബി.ജെ.പി സർക്കാറിനെതിരെ കോൺഗ്രസ്​ ഉപ ലോകായുക്​തയെ സമീപിച്ചത്​.

കോവിഡ്​ പ്രതിരോധത്തിന്​ പി.പി.ഇ കിറ്റടക്കമുള്ള മെഡിക്കൽ ഉപകരണങ്ങൾ ചില സ്വകാര്യ ഇടപാടുകാരിൽനിന്ന്​ അമിത വില നൽകി വാങ്ങുന്നതായാണ്​ ആരോപണം. വിവരാവകാശ നിയമപ്രകാരം​ അസം പബ്ലിക്​ വർക്​സ്​ എന്ന എൻ.ജി.ഒ ആണ്​ ഇത്​ പുറത്തുകൊണ്ടുവന്നത്​. വിഷയത്തിൽ സമഗ്രാന്വേഷണം നടത്തണമെന്ന്​ ഉപ ലോകായുക്ത ജസ്റ്റിസ് ചിത്തരഞ്ജൻ ശർമക്ക്​ സംസ്ഥാന പ്രതിപക്ഷ നേതാവ്​ ദെബബ്രത സൈകിയ അയച്ച കത്തിൽ ആവശ്യപ്പെട്ടു.  

അസം ആരോഗ്യ-കുടുംബക്ഷേമ വകുപ്പിൻെറ നേതൃത്വത്തിൽ പേഴ്‌സണൽ പ്രൊട്ടക്ഷൻ എക്യുപ്‌മെന്റ് (പി.പി.ഇ) ഉൾപ്പെടെയുള്ള വസ്തുക്കൾ വാങ്ങുന്നതിൽ വൻ അഴിമതി നടന്നതായി സൈകിയ കത്തിൽ പറഞ്ഞു. ചില വിതരണക്കാർക്ക് നൽകിയ  മുൻഗണനയും ക്രമക്കേടുകളും സംബന്ധിച്ച് ഗുരുതരമായ ആരോപണങ്ങളാണ്​ ഉയർന്നതെന്ന്​ അദ്ദേഹം ചൂണ്ടിക്കാട്ടി. 

പി‌.പി.‌ഇ കിറ്റ്​, മാസ്​ക്​ എന്നിവയുടെ വിതരണം ഒരു സ്വകാര്യ സംരംഭകൻ കുത്തകയാക്കി വെച്ചതായാണ്​ അസം പബ്ലിക്​ വർക്​സിൻെറ ആരോപണം.  കൂടാതെ മറ്റ് സാധനങ്ങൾ വിതരണം ചെയ്യുന്നതിനുള്ള ടെൻഡറിൽ ക്രമക്കേട്​ നടന്നതായും ഇവർ വ്യക്​തമാക്കി. പകർച്ചവ്യാധി നേരിടാൻ കേന്ദ്രം നൽകിയ 630 കോടി രൂപ ചെലവഴിച്ചതിൽ സുതാര്യത ഉറപ്പുവരുത്തണമെന്നും ഇവർ ആവശ്യപ്പെടുന്നു. 

‘‘490 രൂപയുടെ കിറ്റിന്​ നൽകിയത്​ 1145 രൂപ’’

ഇരട്ടിയിലേറെ തുക നൽകിയാണ്​ സംസ്​ഥാന സർക്കാർ കോവിഡ്​ പ്രതിരോധത്തിനുള്ള വസ്​തുക്കൾ വാങ്ങിയതെന്നാണ്​ പ്രധാന ആരോപണം. പി.പി.ഇ കിറ്റിന്​ നൽകിയ കൊള്ളവില തെളിവായി ചൂണ്ടിക്കാട്ടുന്നു. ​ ഉത്തർപ്രദേശ് സർക്കാർ 490 രൂപക്ക്​ വാങ്ങിയ കിറ്റിന്​ അസം നൽകിയത്​ 1,145 രൂപയാണ്​. 
“അന്വേഷണം അർഹിക്കുന്ന ഗുരുതരമായ ആരോപണങ്ങളാണിത്​. ദുരന്തവേളയിലാണ്​ ഇങ്ങനെ ഒരു തട്ടിപ്പ്​ നടക്കുന്നത്​” കോൺഗ്രസ് നേതാവ് പറഞ്ഞു. എന്നാൽ, ആരോഗ്യവകുപ്പ് ഉദ്യോഗസ്ഥർ ആരോപണങ്ങൾ നിഷേധിച്ചു.