അസമിൽ എ​.ഐ.യു.ഡി.എഫുമായുള്ള സഖ്യം ഉപേക്ഷിച്ച്​ കോൺഗ്രസ്​

ഗുവാഹത്തി: ബദ്​റുദ്ദീൻ അജ്​മലിന്‍റെ എ.ഐ.യു.ഡി.എഫുമായുള്ള സഖ്യം ഉപേക്ഷിക്കുന്നതായി അസം കോൺഗ്രസ്​. കഴിഞ്ഞ നിയമസഭ തെരഞ്ഞെടുപ്പിൽ കോൺഗ്രസ്​ ഉൾപ്പെടുന്ന മഹാസഖ്യത്തിന്‍റെ ഭാഗമായിരുന്നു എ.ഐ.യു.ഡി.എഫ്​. സഖ്യത്തിലുണ്ടായിരുന്ന ബോഡോലാൻഡ്​ പീപ്പിൾസ്​ ഫ്രണ്ടുമായുള്ള ​ (ബി.പി.എഫ്​) സഖ്യവും ഉപേക്ഷിക്കുന്നതായി കോൺഗ്രസ് അറിയിച്ചിട്ടുണ്ട്​. ​

കോൺഗ്രസ്​ സംസ്ഥാന അധ്യക്ഷൻ ഭൂപൻ ഹോറയുടെ നേതൃത്വത്തിൽ കൂടിയ സമിതിയാണ്​ തീരുമാനം പ്രഖ്യാപിച്ചത്​. എ.ഐ.യു.ഡി.എഫിന്‍റെ ബി.ജെ.പിയുമായുള്ള ബന്ധം കോൺഗ്രസ്​ പ്രവർത്തകരെ ആശയക്കുഴപ്പത്തിലാക്കുന്നതിനാലാണ്​ നടപടിയെന്ന്​ കോൺഗ്രസ്​ വക്താവ്​ ബോബീറ്റ ശർമ പ്രതികരിച്ചു.

''എ.ഐ.യു.ഡി.എഫ്​ നേതൃത്വം ബി.ജെ.പിയെയും മുഖ്യമന്ത്രിയെയും നിഗൂഢകാരണങ്ങളാൽ പുകഴ്​ത്തുകയാണ്​. ഇത്​ കോൺഗ്രസിനെ ബാധിച്ചിരിക്കുന്നു. ഇതിനാലാണ്​ സഖ്യത്തിൽ നിന്നും എ.ഐ.യു.ഡി.എഫിനെ ഒഴിവാക്കുന്നതെന്നും വിഷയം എ.ഐ.സി.സിയെ അറിയിച്ചിട്ടുണ്ടെന്നും ബോബീറ്റ ശർമ പറഞ്ഞു.

എന്നാൽ സഖ്യം ഒഴിഞ്ഞത്​ ദൗർഭാഗ്യകരമാണെന്ന്​ എ​.ഐ.യു.ഡി.എഫ്​ നേതാവ്​ ഹാഫിസ്​ ബഷിർ അഹ്​മദ്​ പ്രതികരിച്ചു. ബി.ജെ.പിയുടെ വർഗീയ അജണ്ടകൾക്കെതിരെ ഒന്നിച്ചു നിൽക്കണമെന്നും ചിലരുടെ അഭിപ്രായപ്രകടനങ്ങൾ മുൻ നിർത്തി സഖ്യം തകർക്കരുതെന്നും അദ്ദേഹം കൂട്ടിച്ചേർത്തു.

കോൺഗ്രസ്​. എ​.ഐ.യു.ഡി.എഫ്​, ഇടതുപാർട്ടികൾ അടക്കമുള്ള പാർട്ടികൾ ചേർന്ന സഖ്യം തെരഞ്ഞെടുപ്പിൽ 50 സീറ്റുകളാണ്​ വിജയിച്ചിരുന്നത്​. കോൺ​ഗ്രസ്​ 29 സീറ്റുകളിൽ വിജയിച്ചപ്പോൾ എ.ഐ.യു.ഡി.എഫ്​ 16 സീറ്റുകളിലാണ്​ വിജയിച്ചത്​.