സർക്കാർ മദ്​റസകൾ പൂട്ടാനൊരുങ്ങി അസം; ഖജനാവിലെ പണം മതപഠനത്തിന്​ നൽകാനാവില്ലെന്ന്​

ഗുവാഹതി: സർക്കാർ നിയന്ത്രണത്തിൽ പ്രവർത്തിക്കുന്ന മദ്​റസകൾ അടച്ചുപൂട്ടാനൊരുങ്ങി അസം. പൊതുഖജനാവിലെ പണം മതപഠനത്തിന്​ അനുവദിക്കാനാവില്ലെന്നു ചൂണ്ടിക്കാട്ടി സംസ്​ഥാന ധനകാര്യ-ആസൂത്രണ വകുപ്പ്​ മന്ത്രി ഹിമന്ദ ബിസ്വ ശർമയാണ് പ്രഖ്യാപനം നടത്തിയത്​. ഇതു സംബന്ധിച്ച ഔദ്യോഗിക വിജ്​ഞാപനം അടുത്ത മാസം പുറത്തിറങ്ങുമെന്നും​ മന്ത്രി അറിയിച്ചു. സ്വകാര്യ മദ്​റസകളുടെ കാര്യത്തിൽ സർക്കാർ അഭിപ്രായം പറയുന്നില്ല, എന്നാൽ സർക്കാർ പണം ഇതിനായി വിനിയോഗിക്കാനാവില്ല. സംസ്​കൃത ആശ്രമങ്ങളു​ടെ പ്രവർത്തനം സുതാര്യമാണെന്നും ​അവയുടെ ഭാവി സംബന്ധിച്ച കാര്യങ്ങളും അടുത്തമാസം പുറത്തിറങ്ങുന്ന വിജ്​ഞാ​പനത്തിലുണ്ടാവുമെന്നും മന്ത്രി പറഞ്ഞു..

സംസ്​ഥാനത്ത്​ 614 സർക്കാർ മദ്​റസകളും 900 സ്വകാര്യ മദ്​റസകളുമാണുള്ളത്​. 100 സംസ്​കൃത ആശ്രമങ്ങൾ സർക്കാർ നിയന്ത്രണത്തിലും 500 എണ്ണം സ്വകാര്യമേഖലയിലുമാണ്​. മദ്​റസകൾക്കായി മൂന്നുമുതൽ നാലുകോടി രൂപ വരെയും ആശ്രമങ്ങൾക്കായി ഒരുകോടി രൂപയുമാണ്​ പ്രതിവർഷം സർക്കാർ ചെലവിടുന്നത്​.

ബോഡോലാൻഡ്​​ പ്രവിശ്യ തെരഞ്ഞെടുപ്പും അടുത്തവർഷം നിയമസഭ തെരഞ്ഞെടുപ്പും വരാനിരിക്കെയാണ്​ വംശീയ-ഭാഷാ സംഘർഷങ്ങളുടെ മുൾമുനയിൽ നിൽക്കുന്ന സംസ്​ഥാനത്ത്​ മദ്​റസ പൂട്ടൽ നടപടിയുമായി സർക്കാർ മുന്നോട്ടുവരുന്നത്​. സർക്കാർ നിയന്ത്രണത്തിലെ മദ്​റസകളും ആശ്രമങ്ങളും അടപ്പിച്ച്​ അവയെ പൊതുവിദ്യാലയങ്ങളാക്കി മാറ്റിയെടുക്കാൻ ഈ വർഷത്തി​െൻറ തുടക്കത്തിൽ നീക്കമുണ്ടായിരുന്നുവെങ്കിലും പിന്നീട്​ സംസ്​കൃത വിദ്യാലയങ്ങളുടെ കാര്യത്തിൽ നിലപാട്​ മാറ്റുകയായിരുന്നു. രണ്ടുവർഷം മുമ്പ്​ സംസ്​ഥാന മദ്​റസ വിദ്യാഭ്യാസ ബോർഡും സംസ്​കൃത ബോർഡും നിർത്തലാക്കി മദ്​റസകൾ സെക്കൻഡറി വിദ്യാഭ്യാസ ബോർഡിനു കീഴിലും ആശ്രമങ്ങൾ കുമാർ ഭാസ്​കർ വർമ സംസ്​കൃത പൈതൃക സർവകലാശാലക്കു​ കീഴിലും കൊണ്ടുവന്ന്​ അവിടങ്ങളിൽ ആധുനിക പാഠ്യപദ്ധതി ആരംഭിക്കാനും തീരുമാനിച്ചിരുന്നു.

അതേസമയം, അടുത്തവർഷം നടക്കുന്ന തെരഞ്ഞെടുപ്പിനുശേഷം അധികാരത്തിൽ വന്നാലുടൻ അടച്ചുപൂട്ടുന്ന മദ്​റസകൾ തുറക്കാൻ നടപടി സ്വീകരിക്കുമെന്ന്​ ഒാൾ ഇന്ത്യ യുനൈറ്റഡ്​ ഡമോക്രാറ്റിക്​ ഫ്രണ്ട്​ (എ.ഐ.യു.ഡി.എഫ്​) മേധാവി ബദ്​റുദ്ദീൻ അജ്​മൽ എം.പി വ്യക്​തമാക്കി.