മുൻ ജഡ്​ജിയെയും രാഷ്​ട്രീയക്കാരെയും കബളിപ്പിച്ച്​ 80 കോടി തട്ടിയ ജ്യോത്സ്യൻ അറസ്റ്റിൽ

ബംഗളൂരു: കർണാടകയിൽ ജഡ്​ജിയെയും രാഷ്​ട്രീയക്കാരെയും കബളിപ്പിച്ച്​ പണം തട്ടിയ ജ്യോത്സ്യൻ അറസ്റ്റിൽ. കർണാടക ഹൈകോടതി മുൻ ജഡ്​ജിയിൽനിന്നും ബിസിനസുകാരിൽനിന്നുമായി 80 കോടി രൂപയാണ്​ ജ്യോത്സ്യൻ തട്ടിയത്​.

കേന്ദ്ര, സംസ്​ഥാന ഉന്നത നേതാക്കളുമായി അടുത്ത ബന്ധമുണ്ടെന്ന്​ നടിച്ചായിരുന്നു തട്ടിപ്പ്​. യുവരാജ്​ സ്വാമി, യുവരാജ്​ രാംദാസ്​, സേവലാൽ എന്നീ പേരുകളിൽ അറിയപ്പെടുന്ന 54 കാരനാണ്​ അറസ്റ്റിലായത്​. ബംഗളൂരുവിൽ ഇയാ​ൾക്കെതിരെ 14 കേസുകൾ രജിസ്റ്റർ ​െചയ്​തിട്ടുണ്ട്​. കള്ളപ്പണ​ം വെളുപ്പിക്കലിനാണ്​ എ​ൻഫോഴ്​സ്​മെന്‍റ്​ ഡയറക്​ടറേറ്റ്​ കേസെടുത്തത്​.

ഗവർണർ, എം.പിമാർ, കേന്ദ്രമന്ത്രിമാർ, സംസ്​ഥാന മന്ത്രിമാർ, മറ്റു ഉന്നത സ്​ഥാനങ്ങളിൽ ഇരിക്കുന്നവർ തുടങ്ങിയവരുമായി അടുത്ത ബന്ധം പുലർത്തിയിരുന്നതായി സേവലാൽ ഇരകളെ തെറ്റിദ്ധരിപ്പിച്ചിരുന്നു. ഇവരെ പരിചയപ്പെടുത്തി നൽകാമെന്ന്​ കബളിപ്പിച്ചാണ്​ പണംതട്ടൽ.

മുൻ കർണാടക ഹൈകോടതി ജഡ്​ജി ബി.എസ്​. ഇന്ദ്രലേഖയിൽനിന്ന്​ എട്ടുകോടി രൂപയാണ്​ ഇയാൾ തട്ടിയെടുത്തത്​. 2018- 19 കാലയളവിൽ ഉയർന്ന സർക്കാർ പദവി വാങ്ങി നൽകാമെന്ന്​ പ്രലോഭിപിച്ച്​ ഉന്നത നേതാക്കളെ പരിചയപ്പെടുത്തി നൽകാമെന്ന്​ പറഞ്ഞായിരുന്നു തട്ടിപ്പ്​.

മുൻ ബി.ജെ.പി എം.പി 10 കോടി രൂപയാണ്​ ജ്യോത്സ്യന്​​ നൽകിയത്​. തെരഞ്ഞെടുപ്പിലെ പുനർ നാമനിർദേശവും മന്ത്രിസ്​ഥാനവുമായിരുന്നു വാഗ്​ദാനം. പണം നഷ്​ടപ്പെട്ടിട്ടും മുൻ എം.പി പരാതി നൽകാൻ തയാറായിരുന്നില്ല. എന്നാൽ അ​ദ്ദേഹത്തിൻെ സഹപ്രവർത്തകർ തട്ടിപ്പ്​ സംബന്ധിച്ച്​ 2019 ഡിസംബറിൽ ​െപാലീസിൽ പരാതി നൽകുകയായിരുന്നു.

ഡിസംബർ 14ന്​ ബിസിനസുകാരനായ കെ.പി. സുധീന്ദ്ര റെഡ്ഡി നൽകിയ പരാതിയുടെ അടിസ്​ഥാനത്തിൽ ഡിസംബർ 16നാണ്​ ​േജ്യാത്സ്യനെ ആദ്യം ബംഗളൂരു ​െപാലീസ്​ അറസ്റ്റ്​ ചെയ്യുന്നത്​. 1.5 കോടിയാണ്​ ഇയാളിൽനിന്ന്​ തട്ടിയെടുത്തത്​. സർക്കാർ ബന്ധങ്ങൾ ഉപയോഗപ്പെടുത്തി കർണാടക സ്​റ്റേറ്റ്​ റോഡ്​ ട്രാൻപോർട്ട്​ കോർപറേഷൻ ചെയർമാൻ സ്​ഥാനം വാങ്ങി നൽകാമെന്ന്​ വിശ്വസിപ്പിച്ചായിരുന്നു തട്ടിപ്പ്​.

​േജ്യാത്സ്യൻ അറസ്റ്റിലായതോടെ സമാന പരാതിയുമായി ഇന്ദ്രലേഖ, ബി.ജെ.പി നേതാവ്​ ആനന്ദ കുമാർ കോല തുടങ്ങിയവർ രംഗത്തെത്തുകയായിരുന്നു. ജ്യോത്സ്യന്‍റെ പേരിലെ 26 ഭൂസ്വത്തുക്കൾ കണ്ടുകെട്ടാൻ ബംഗളൂരു സിവിൽ ആൻഡ്​ സെഷൻസ്​ കോടതി ഉത്തരവിട്ടു. 80 കോടിയോളം ആസ്​തിയുടെ സ്വത്തുക്കളാണ്​ കണ്ടുകെട്ടിയത്​. രണ്ടുദിവസം മുമ്പ്​ ബംഗളൂരു കോടതി ഇയാൾക്ക്​ ജാമ്യം നിഷേധിച്ചു. രാഷ്​ട്രീയമായും സാമ്പത്തികമായും ഉന്നത സ്വാധീനമുള്ള വ്യക്തിയായതിനാൽ ജാമ്യം അനുവദിക്കരുതെന്നായിരുന്നു പൊലീസ്​ വാദം.