ഗണേശ ഘോഷയാത്രക്കിടെ പള്ളിക്കുനേരെ ചെരിപ്പേറ്; നാലുപേർ പിടിയിൽ

ബംഗളൂരു: കർണാടകയിൽ ഗണേശ ഘോഷയാത്രക്കിടെ മസ്ജിദിനുനേരെ ചെരിപ്പെറിഞ്ഞ സംഭവത്തിൽ നാലുപേരെ പൊലീസ് പിടികൂടി. ബെള്ളാരി സിരിഗുപ്പയിലാണ് സംഭവം. നിതേഷ് കുമാർ (22), ഭീമണ (23), അശോക് (22), അഞ്ജനെയാലു (21) എന്നിവരാണ് പിടിയിലായത്.

വർഗീയ സംഘർഷം ലക്ഷ്യംവെച്ച് നിതേഷാണ് ചെരിപ്പെറിഞ്ഞതെന്ന് പൊലീസ് പറഞ്ഞു. പ്രതികൾക്കെതിരെ ഉചിതമായ നിയമനടപടി സ്വീകരിക്കുമെന്ന് എ.ഡി.ജി.പി അലോക് കുമാർ പറഞ്ഞു. ഘോഷയാത്രക്ക് പൊലീസ് കനത്ത സുരക്ഷയൊരുക്കിയിരുന്നെങ്കിലും അതിനിടെ ആരാണ് ചെരിപ്പെറിഞ്ഞതെന്ന് പൊലീസിന് കണ്ടെത്താനായിരുന്നില്ല.എന്നാൽ, സംഭവത്തിന്റെ വിഡിയോ ദൃശ്യങ്ങൾ സമൂഹമാധ്യമങ്ങളിൽ പ്രചരിച്ചതിന് പിന്നാലെയാണ് പൊലീസ് പ്രതികളെ അറസ്റ്റ് ചെയ്തത്.