മമതയെ വകവരുത്താൻ ഗൂഡാലോചനയെന്ന്​ തൃണമൂൽ; അന്വേഷണം ആവശ്യപ്പെട്ട്​ എം.പിമാർ തെരഞ്ഞെടുപ്പ് കമ്മീഷനെ കണ്ടു

ന്യൂദൽഹി: പശ്ചിമ ബംഗാൾ മുഖ്യമന്ത്രി മമത ബാനർജിക്ക്​ നേരെ നടന്ന ആക്രമണത്തെ കുറിച്ച്​ ഉന്നതതല അന്വേഷണം ആവശ്യപ്പെട്ട്​ ആറ് തൃണമൂൽ കോൺഗ്രസ്​ എം.പിമാർ തെരഞ്ഞെടുപ്പ് കമ്മീഷൻ ഉദ്യോഗസ്ഥരെ സന്ദർശിച്ചു. ഡെറക് ഒബ്രിയൻ, സൗഗത റോയ്, കക്കോലി ഘോഷ് ദസ്തിദാർ, ശതാബ്​ദി റോയ്, പ്രതിമ മൊണ്ടാൽ, ശാന്തനു സെൻ എന്നിവരാണ്​ ഡൽഹി നിർവചൻ സദസ്സിലെത്തി ഉദ്യോഗസ്​ഥരെ സന്ദർശിച്ചത്​.

മമതയെ വകവരുത്താനുള്ള ഗൂഡാലോചനയാണ്​ നന്ദിഗ്രാമിൽ നടന്നതെന്ന്​ ആരോപിച്ച നേതാക്കൾ, അക്രമം അഴിച്ചുവിടാൻ ബിജെപി അയൽ സംസ്ഥാനങ്ങളിൽ നിന്ന് സാമൂഹിക വിരുദ്ധരെ നന്ദിഗ്രാമിൽ എത്തിച്ചതായും പറഞ്ഞു. വോ​ട്ടെടുപ്പ്​ പ്രഖ്യാപിച്ചതിനാൽ പശ്ചിമ ബംഗാളിലെ ക്രമസമാധാന പാലന ചുമതല തെരഞ്ഞെടുപ്പ്​ കമ്മീഷനാണ്​. സംഭവത്തിൽ നടപടി സ്വീകരിക്കാനുള്ള ഉത്തരവാദിത്തത്തിൽ നിന്ന്​ കമീഷന്​ ഒഴുഞ്ഞുമാറാനാവില്ലെന്നും എം.പിമാർ ചൂണ്ടിക്കാട്ടി.

ബുധനാഴ്ച നന്ദിഗ്രാമിൽ പ്രചാരണത്തിനിടെയാണ്​ മമതക്ക്​ നേരെ കൈയ്യേറ്റ ശ്രമം നടന്നത്​. രാജ്യത്തെ ഏക വനിത മുഖ്യമന്ത്രിയായ മമത ബാനർജിക്ക്​ നേരെ നടന്ന അക്രമത്തിൽ എല്ലാവരും ആശങ്ക പ്രകടിപ്പിച്ചിട്ടും പ്രധാനമന്ത്രിയും ആഭ്യന്തരമന്ത്രിയും മൗനം പാലിക്കുകയാണെന്ന്​ തൃണമൂൽ നേതാവ്​ പാർത്ഥ ചാറ്റർജി പറഞ്ഞു. പാർട്ടിയുടെ പ്രതിനിധി സംഘം വ്യാഴാഴ്ച കൊൽക്കത്തയിൽ തെരഞ്ഞെടുപ്പ് കമ്മീഷനെ കണ്ടിരുന്നു.