രണ്ട്​ കോടിയുടെ ഭൂമിക്ക്​ മിനിറ്റുകൾക്കകം 18.5 കോടി- അയോധ്യ ഭൂമി അഴിമതി ആരോപണത്തിൽ കൂടുതൽ തെളിവുകളുമായി പ്രിയങ്ക ഗാന്ധി

ലഖ്​നോ: അയോധ്യയിലെ രാമക്ഷേത്ര ട്രസ്റ്റിന്‍റെ ഭൂമിയിടപാട്​ സംബന്ധിച്ച അഴിമതി ആരോപണത്തിൽ കൂടുതൽ തെളിവുകൾ പുറത്തുവിട്ട്​ കോൺഗ്രസ്​ നേതാവ്​ പ്രിയങ്ക ഗാന്ധി. ക്ഷേത്രത്തിന്​ സമീപത്തുള്ള രണ്ട്​​ കോടി വിലവരുന്ന സ്ഥലത്തിന്​ അഞ്ച്​ മിനിറ്റിനകം 18.5 കോടി രൂപ വരെ വില ഉയർത്തിയതായി വസ്തുവിൽപന രേഖകൾ മാധ്യമങ്ങൾക്ക് മുമ്പിൽ നിരത്തി പ്രിയങ്ക ഗാന്ധി ആരോപിച്ചു.

രാമക്ഷേത്ര നിർമ്മാണവുമായി ബന്ധപ്പെട്ട്​ വൻ ഭൂമി കുംഭകോണമാണ്​ നടക്കുന്നതെന്ന്​ നേരത്തേ കോൺഗ്രസ്​ ആരോപണമുയർത്തിയിരുന്നു. ബി.ജെ.പി നേതാക്കളുടെയും സർക്കാർ ഉദ്യോഗസ്ഥരുടെയും ബന്ധുക്കൾ ക്ഷേത്രത്തിന് സമീപത്തിന്​ അനധികൃത മാർഗങ്ങളിലൂടെ ഭൂമി വാങ്ങി എന്ന ആരോപങ്ങളിൽ ഉത്തർപ്രദേശ് സർക്കാർ അന്വേഷണത്തിന് ഉത്തരവിട്ടിട്ടുണ്ട്. രാമക്ഷേത്രത്തിന് സമീപമുള്ള രണ്ട്​ കോടി രൂപ വിലമതിക്കുന്ന ഭൂമി രണ്ട് ഭാഗമാക്കി ഒരു ഭാഗം 8 കോടി രൂപക്കും രണ്ടാം ഭാഗം 18.5 കോടി രൂപക്കും 2020ൽ സ്ഥാപിച്ച രാമക്ഷേത്ര ട്രസ്റ്റുമായി ഇടപാട്​ നടത്തിയതായാണ്​ പ്രിയങ്ക ചൂണ്ടിക്കാട്ടിയത്​. അതായത്​ രണ്ട്​ കോടി വിലയുള്ള ഭൂമി ട്രസ്റ്റ് വാങ്ങിയത് 26.5 കോടി രൂപക്കാണ്.

'2017ൽ ഒരു വ്യക്തി വാങ്ങിയ ഭൂമി അയാൾ രണ്ട്​ രണ്ട് ഭാഗങ്ങളാക്കി വിൽക്കുകയായിരുന്നു. ആദ്യ ഭാഗം 8 കോടി രൂപക്ക്​ നേരിട്ട് രാംമന്ദിർ ട്രസ്റ്റിന്​ വിറ്റു.19 മിനിറ്റിന്​ ശേഷം രണ്ടാം ഭാഗം രവി മോഹൻ തിവാരി എന്ന വ്യക്തിക്ക് രണ്ട്​ കോടി രൂപക്ക്​ വിറ്റു. അഞ്ച്​ മിനിറ്റിന് ശേഷം രവി മോഹൻ തിവാരി ഈ രണ്ട്​ കോടി രൂപയുടെ സ്ഥലം 18.5 കോടി രൂപക്ക്​ രാംമന്ദിർ ട്രസ്റ്റിന് വിറ്റു. അടിസ്ഥാനപരമായി രണ്ട്​ കോടി രൂപ വിലയുള്ള ഭൂമി ട്രസ്റ്റ് എട്ട്​ കോടി രൂപക്കും 18.5 കോടി രൂപക്കുമാണ്​ വാങ്ങിയത്​' -പ്രിയങ്ക ഗാന്ധി പറഞ്ഞു.

'ഒരു വ്യക്തിക്ക്​ രണ്ട്​ കോടി രൂപക്ക്​ വിറ്റ ഭൂമി അഞ്ച്​ മിനിറ്റിനുള്ളിൽ 18.5 കോടി രൂപക്ക്​ വിൽക്കുന്നു. ഇത് അഴിമതി അല്ലെങ്കിൽ പിന്നെന്താണ്?'-പ്രിയങ്ക ചോദിച്ചു. ഈ ഭൂമി ഇടപാടുകളിലെ സാക്ഷികൾ ആർ.എസ്.എസിന്‍റെ മുതിർന്ന അംഗവും രാംമന്ദിർ കമ്മിറ്റിയിലെ അംഗവും പിന്നെ അയോധ്യയിലെ മേയറുമാണ്​. ആരോപണങ്ങളിൽ അന്വേഷണം നടത്താൻ ജില്ലാ പരിഷത്ത്​ ഉദ്യോഗസ്ഥനെ യു.പി സർക്കാർ നിയോഗിച്ചിട്ടുണ്ട്. എന്നാൽ, രാമക്ഷേത്ര നിർമാണം സുപ്രീം കോടതിയുടെ നിരീക്ഷണത്തിൽ ആയതിനാൽ ഈ ആരോപണങ്ങളും സുപ്രീം കോടതിയുടെ പരിധിയിൽ വരണമെന്ന് പ്രിയങ്ക ആവശ്യപ്പെട്ടു.

ഭൂമിയുടെ ഉടമസ്ഥാവകാശം കൈമാറ്റം ചെയ്യപ്പെടുമ്പോൾ നിമിഷങ്ങൾക്കുള്ളിൽ കോടിക്കണക്കിന്​ വില ഉയർന്നതിനാൽ, ലോകത്തിൽ തന്നെ ഏറ്റവും വേഗത്തിൽ ഭൂമി വില ഉയർന്ന സംഭവമാണിതെന്ന് കോൺഗ്രസ് നേതാവ് രണ്‍ദീപ് സുര്‍ജേവാല പരിഹസിച്ചു.

അതേസമയം, രാമക്ഷേത്ര നിർമ്മാണവുമായി ബന്ധപ്പെട്ട ഭൂമി ഇടപാടിലെ അഴിമതിക്കെതിരെ സമാജ്​വാദി പാർട്ടിയും ആം ആദ്​മി പാർട്ടിയും രംഗത്തെത്തിയിട്ടുണ്ട്. ഭൂമി ഇടപാടുമായി ബന്ധപ്പെട്ട് സി.ബി.ഐ അന്വേഷണം വേണമെന്ന്​ ഈ വർഷം ജൂണിൽ സമാജ്​വാദി പാർട്ടി ആവശ്യപ്പെട്ടിരുന്നു. എന്നാൽ, ആരോപണങ്ങൾ അടിസ്ഥാനരഹിതമാണെന്നാണ്​ രാമജന്മഭൂമി തീർഥ ക്ഷേത്ര ട്രസ്റ്റിന്‍റെ ഭാരവാഹികൾ പറയുന്നത്​. സ്ഥലം ഉടമകളുമായി വില സംബന്ധിച്ച്​ വർഷങ്ങൾക്ക്​ മുമ്പേ തന്നെ ധാരണയായെന്നാണ്​ വിശ്വഹിന്ദു പരിഷത്ത്​ നേതാവും രാമജന്മഭൂമി തീർഥ ക്ഷേത്ര ട്രസ്റ്റ്​ സെക്രട്ടറിയുമായ ചമ്പത്ത്​ റായ്​ പറയുന്നത്​. വാങ്ങു​ന്ന സമയത്ത്​ എത്ര വിലയാണോ അത്​ നൽകാമെന്നായിരുന്നു ധാരണയെന്നും അദ്ദേഹം പറയുന്നു.