കോവിഡിനെതിരെ കുട്ടികളിൽ​ പ്രതിരോധ ​​േശഷി കൂട്ടാൻ ആയൂർവേദ കിറ്റുമായി സർക്കാർ

ന്യൂഡൽഹി: രാജ്യത്ത്​ കോവിഡ്​ മൂന്നാം തരംഗ ഭീഷണി നിലനിൽക്കുന്ന സാഹചര്യത്തിൽ കുട്ടികളിൽ രോഗ പ്രതിരോധ ശേഷി വർധിപ്പിക്കുന്നതിനുള്ള ആയുർവേദ കിറ്റ്​​ വികസിപ്പിച്ച്​​ കേന്ദ്ര ആയുഷ്​ മന്ത്രാലയം.

'ബാൽ രക്ഷ കിറ്റ്​' എന്ന്​ പേരിട്ടിരിക്കുന്ന പ്രതിരോധ മരുന്നിൽ തുളസി, ചിറ്റാമൃതം, ഏലം, ഇരട്ടിമധുരം, ഉണക്ക മുന്തിരി എന്നിവക്കൊപ്പം ചവനപ്രാശ്യം ഉൾപ്പെടെയുള്ള ചേരുവകളാണ്​ അടങ്ങിയിരിക്കുന്നത്​. സിറപ്പ്​ രൂപത്തിലുള്ള പ്രതിരോധ മരുന്ന്​ കുട്ടികളിൽ കോവിഡ്​ പ്രതിരോധ ശേഷി വർധിപ്പിക്കാൻ സഹായിക്കുമെന്ന്​​ ആയുഷ്​ മന്ത്രാലയ ഡയറക്​ടർ ഡോ. തനുജ നെസറി പറഞ്ഞു.

16 വയസ്സുവരെയുള്ള കുട്ടികൾക്ക്​ 'ബാൽ രക്ഷ കിറ്റുകൾ' വിതരണം ചെയ്യാനാണ്​ മ​ന്ത്രാലയത്തി​ന്‍റെ തീരുമാനം​. ആയുഷ്​ മന്ത്രാലയത്തിന്​ കീഴിൽ ഉത്തരാഖണ്ഡിലെ ആയുർവേദ മരുന്ന്​ നിർമാണ പ്ലാൻറിൽ ഇന്ത്യൻ മെഡിസിൻസ്​ ഫാർമസ്യൂട്ടിക്കൽ കോർപറേഷൻ ലിമിറ്റഡ് (ഐ.എം.പി.സി.എൽ) ആയിരിക്കും കിറ്റുകൾ നിർമിക്കുക.​ ദേശീയ ആയുർവേ ദിനമായ നവംബർ രണ്ടിന്​ 10,000 ബാൽ രക്ഷ കിറ്റുകൾ സൗജന്യമായി വിതരണം ചെയ്യുമെന്നും ഡോ. തനുജ കൂട്ടിച്ചേർത്തു.