ബജ്​റങ്​ദൾ പ്രവർത്തക‍​ന്‍റെ കൊല: ആറുപേർ അറസ്​റ്റിൽ

ബംഗളൂരു: ശിവമൊഗ്ഗയിൽ ബജ്​റങ്​ദൾ പ്രവർത്തകൻ ഹർഷ (28) കൊല്ലപ്പെട്ട സംഭവത്തിൽ നാലുപേർ കൂടി അറസ്റ്റിൽ. ഇതോടെ കേസിൽ അറസ്റ്റിലായവരുടെ എണ്ണം ആറായി. ശിവമൊഗ്ഗ ബുദ്ധനഗർ സ്വദേശി മുഹമ്മദ്​ കാഷിഫ്​ (30), ജെ.പി നഗർ സ്വദേശി സെയ്​ദ്​ നദീം (20), ആസിഫുല്ല ഖാൻ, റിഹാൻ ശരീഫ്​, നിഹാൻ, അബ്​ദുൽ അഫ്​നാൻ എന്നിവരാണ്​ പിടിയിലായത്​. 12 പേരെ ചോദ്യം ചെയ്യാൻ കസ്റ്റഡിയിലെടുത്തു.

പ്രതികളിലൊരാൾ ആറു മാസംമുമ്പ്​ ഹർഷയുമായി വഴക്കിട്ടിരുന്നു. കൊലപാതകത്തിന്​ പിന്നിൽ ഈ സംഭവമാണെന്നും പ്രതികൾ മയക്കുമരുന്നിന്‍റെ സ്വാധീനത്തിലാണ്​ കൃത്യം നടത്തിയതെന്നുമാണ്​ പ്രാഥമിക നിഗമനമെന്ന്​ ശിവമൊഗ്ഗ എസ്​.പി ബി.എം. ലക്ഷ്മി പ്രസാദ്​ പറഞ്ഞു. കൊല്ലപ്പെട്ട ഹർഷക്കെതിരെ കലാപത്തിന്‍റെ പേരിലും മതവികാരം വ്രണപ്പെടുത്തിയതിനും രണ്ടു കേസുകൾ നിലവിലുണ്ട്​.

ഏതെങ്കിലും സംഘടനകളുമായി ബന്ധമുണ്ടോ എന്നതടക്കം കേസിന്‍റെ എല്ലാ വശവും പരിശോധിക്കുമെന്നും അദ്ദേഹം പറഞ്ഞു.

ശിരോവസ്ത്ര വിവാദത്തിന്​ പിന്നിലെ മതസംഘടനകൾക്ക്​ ഈ കൊലപാതകവുമായി ബന്ധമുണ്ടോ എന്ന കാര്യം പരിശോധിക്കുന്നുണ്ടെന്ന്​ ആഭ്യന്തര മന്ത്രി അരഗ ജ്ഞാനേന്ദ്ര പ്രതികരിച്ചു.

കൊലപാതകത്തിന്​ പിന്നിൽ മുസ്​ലിംകളാണെന്ന്​ ബി.ജെ.പിയും വ്യക്​തിവൈരാഗ്യമാണെന്ന്​ കോൺഗ്രസും ആരോപിച്ചു. ഹർഷയുടെ ചിതാഭസ്മം രഥയാത്രയായി ​​ശ്രീരംഗപട്ടണയിൽ നദിയിലൊഴുക്കുമെന്ന്​ സക്കരായനപുര കാളി മഠത്തിലെ റിഷികുമാര സ്വാമിജി പറഞ്ഞു.

അതേസമയം, ഹർഷയുടെ കൊലപാതകവുമായി ബന്ധപ്പെട്ട വിദ്വേഷ പോസ്റ്റിട്ട 'മാംഗ്ലൂർ മുസ്​ലിംസ്​' ഫേസ്​ബുക്ക്​ പേജിനെതിരെ പൊലീസിലെ സമൂഹമാധ്യമ നിരീക്ഷണ സെല്ലിന്‍റെ പരാതിയിൽ സൈബർ ഇക്കണോമിക്​ ആൻഡ്​ നാർക്കോടിക്​ ക്രൈം വിഭാഗം കേ​സെടുത്തു.

ശിവമൊഗ്ഗ ജില്ലയിലെ നിരോധനാജ്ഞ രണ്ടു ദിവസത്തേക്കുകൂടി നീട്ടിയതായി ഡെപ്യുട്ടി കമ്മീഷണർ ഡോ. ആർ. ശെൽവമണി അറിയിച്ചു. ശിവമൊഗ്ഗക്ക്​ പുറമെ, ദക്ഷിണ കന്നഡ, ഉഡുപ്പി, ഉത്തരകന്നഡ, ചിക്കമകളൂരു, കുടക്​ തുടങ്ങിയ ജില്ലകളിലും പൊലീസ്​ സുരക്ഷ ശക്തമാക്കി. കൊലപാതകവും അക്രമവും അരങ്ങേറിയ തുംഗനഗർ സാധാരണനിലയിലേക്ക്​ തിരിച്ചുവന്നു. യുവാവിന്‍റെ മൃതദേഹവും വഹിച്ചുള്ള വിലാപയാത്രക്കിടെ നടന്ന കല്ലേറിൽ നിരവധി വീടുകൾക്കും സ്ഥാപനങ്ങൾക്കും കേടുപാട്​ സംഭവിച്ചിരുന്നു. രണ്ട്​ ബൈക്കും രണ്ട്​ ഓട്ടോയോ അക്രമികൾ അഗ്​നിക്കിരയാക്കിയതായി ഡെപ്യുട്ടി കമ്മീഷണർ പറഞ്ഞു.