ആൾക്കൂട്ട മർദനത്തിനി​രയായ മുസ്​ലിം യുവാവിനെതിരെ പീഡന പരാതി​; പ്രതികളെ രക്ഷിക്കാൻ പൊലീസ്​ ശ്രമിക്കുന്നെന്ന്​

ഭോപാൽ: മധ്യപ്രദേശിലെ ഇൻഡോറിൽ ​​ക്രൂര ആൾക്കൂട്ട മർദനത്തിന്​ ഇരയായ 25കാരനെതിരെ പോക്​സോ കേസ് ചുമത്തി പൊലീസ്​​. ആക്രമണം നടന്ന്​ 24 മണിക്കൂറിനിടെയാണ്​ 13കാരിയെ ഉപദ്രവിച്ചുവെന്നാരോപിച്ച്​ കേസ്​ രജിസ്റ്റർ ചെയ്​തത്​.

ഗോവിന്ദ്​ നഗറിൽ വളക്കച്ചവടം നടത്തിയ 25കാരൻ തസ്​ലീമിനുനേരെയാണ്​ ആക്രമണമുണ്ടായത്​. ഹിന്ദുവാണെന്ന്​ ചമഞ്ഞ്​ വ്യാജപേര്​ ഉപയോഗിച്ച്​ പ്രദേശത്ത്​ കച്ചവടം നടത്തിയെന്നാരോപിച്ചായിരുന്നു തസ്​ലിമിന്​ നേരെ മർദനം. മർദനത്തിന്‍റെ ദൃശ്യങ്ങൾ സമൂഹമാധ്യമങ്ങളിൽ വൈറലായതോടെ വൻ പ്രതിഷേധം ഉയർന്നിരുന്നു. ഇതിനുപിന്നാലെയാണ്​ തസ്​ലിമിനെതിരെ പോക്​സോ വകുപ്പുകൾ​ ചുമത്തി കേസെടുത്തിരിക്കുന്നത്​.

ആഗസ്റ്റ്​ 22ന്​ ഉച്ച രണ്ടുമണ​ിയോടെ താനും അമ്മയും മാത്രം വീട്ടിലുണ്ടായിരുന്നപ്പോൾ യുവാവ്​ വളവിൽക്കാനെത്തിയതായി പെൺകുട്ടിയുടെ പരാതിയിൽ പറയുന്നു. ആഗസ്റ്റ്​ 23ന്​ വൈകിട്ട്​ 5.49നാണ്​ പെൺകുട്ടിയുടെ പരാതിയിൽ എഫ്​.ഐ.ആർ രജിസ്റ്റർ ചെയ്​തത്​. പൊതു നാണക്കേട്​ ഭയന്നാണ്​ പരാതി നൽകാൻ വൈകിയതെന്നും എഫ്​.ഐ.ആറിൽ പറയുന്നു.

എന്നാൽ, പെൺകുട്ടി പരാതി നൽകുന്നതിന്​ മുമ്പുതന്നെ സംസ്​ഥാന ആഭ്യന്തരമന്ത്രി നരോത്തം മിശ്ര യുവാവിനെതിരെ പീഡന ആരോപണവുമായി രംഗത്തെത്തിയിരുന്നു. രാവിലെ 11ഓടെയാണ്​ മന്ത്രി മാധ്യമങ്ങളെ കണ്ടത്​.

'ഇയാൾ പേരും മതവും പിതാവിന്‍റെ പേരും ജാതിയും മറച്ചുവെച്ച്​ വളകൾ വിൽക്കുകയായിരുന്നു. ഇയാൾക്ക്​ രണ്ട്​ ആധാർ കാർഡുകളുണ്ട്​. കൂടാതെ വളകൾ വിൽക്കുന്നതിനിടെ മോശമായി പെരുമാറുകയും ചെയ്​തു. ഇതാണ്​ മർദനത്തിന്​ കാരണമായതെന്ന്​ എന്നോട്​ പൊലീസ്​ അറിയിച്ചു' -മന്ത്രി മാധ്യമങ്ങളോട്​ പറഞ്ഞു.

സംഭവം നടക്കു​േമ്പാൾ പിതാവ്​ മാർക്കറ്റിൽ പോയിരിക്കുകയാണെന്ന്​ പൊലീസിന്​ ലഭിച്ച പരാതിയിൽ പറയുന്നു. എന്നാൽ, യുവാവിനെ മർദിക്കുന്ന മൂന്നുപേരിൽ ഒരാൾ പെൺകുട്ടിയ​ുടെ പിതാവാണെന്ന്​ ഇൻഡോർ പൊലീസ്​ സൂപ്രണ്ട്​ അശുതോഭ്​ ബഗ്രിയുടെ പ്രസ്​താവനയിൽനിന്ന്​ വ്യക്തമായിരുന്നു.

തസ്​ലിമിന്‍റെ പരാതിയിൽ തിങ്കളാഴ്ച അർധരാത്രിയോടെയാണ്​ ഒരു എഫ്.ഐ.ആറും രജിസ്റ്റർ ചെയ്​തിരിക്കുന്നത്​. എന്നാൽ, മർദനമേറ്റ ​ശേഷം ഉടൻ തന്നെ തസ്​ലിം പൊലീസ്​ സ്​റ്റേഷനി​െലത്തിയിരുന്നു. ഞായറാഴ്ച നടന്ന അക്രമത്തിൽ അന്നുതന്നെ യുവാവ്​ പരാതി നൽകിയിട്ടും കേസ്​ രജിസ്റ്റർ ​ ​െചയ്യാൻ വൈകിയതെന്താണെന്ന്​ പൊലീസ്​ വ്യക്തമാക്കാൻ തയാറായിട്ടില്ല. പ്രതിഷേധം ഉയർന്നതോടെ തസ്​ലിമിന്‍റെ പരാതിയിൽ പൊലീസ്​ കേസ്​ എടുക്കാൻ തയാറാ​യതെന്ന്​ പ്രതിപക്ഷം ആരോപിച്ചു. പ്രതികളെ രക്ഷപ്പെടുത്താനുള്ള ​ശ്രമമാ​ണ്​ പൊലീസ്​ നടത്തുന്നതെന്നും ആരോപണം ഉയരുന്നുണ്ട്​.

സംഭവത്തിന്‍റെ വിഡിയോ ദൃശ്യങ്ങൾ വ്യാപകമായി പ്രചരിച്ചതോടെ സംഭവം രാഷ്​ട്രീയ വിവാദമായിരുന്നു. ഗോവിന്ദ്​ നഗറിൽ​ ഇനി മേലിൽ വരരുതെന്നും ഞങ്ങളുടെ പെങ്ങൻമാരും പെൺമക്കളും വരുന്നയിടത്ത്​ വള വിൽക്കുകയാണോ എന്നും ചോദിച്ചായിരുന്നു മർദനം. ക്രൂരമായി മർദിച്ച ശേഷം യുവാവിന്‍റെ കച്ചവട സാധനങ്ങളും നശിപ്പിക്കുകയുമായിരുന്നു.