ആടിനെ രക്ഷിക്കാൻ ശ്രമിക്കുന്നതിനിടെ 35കാരനെ സിംഹം കടിച്ചുകൊന്നു

അഹ്​മദാബാദ്​: ഗുജറാത്തിൽ ആടിനെ രക്ഷിക്കാൻ ശ്രമിക്കുന്നതി​നിടെ 35കാരനെ സിംഹം കടിച്ചുകൊന്നു. ഗുജറാത്തിലെ തലാല താലൂക്കിലാണ്​ സംഭവം.

വള വിൽപ്പനക്കാരനായ​ ബഹദൂർഭായ്​ ജീവാഭായ്​ ആണ്​ കൊല്ലപ്പെട്ടത്​. മാധവ്​പ​ുർ ഗ്രാമത്തിൽ കുടിലിലാണ്​ ജീവാഭായ്​യുടെ താമസം. ശനിയാഴ്ച രാത്രി ഒരുമണിയോടെ കുടിലിന്​ പുറത്തെത്തിയ​ സിംഹം പുറത്ത്​ കെട്ടിയിട്ടിരുന്ന ആടിനെ ആക്രമിക്കുകയായിരുന്നു. പുറത്ത്​ കിടന്നുറങ്ങുകയായിരുന്ന ജീവാഭായ്​ ആടിനെ സിംഹം ആക്രമിക്കുന്നത്​ കാണുകയ​ുമായിരുന്നു. ആടിനെ രക്ഷിക്കാൻ ശ്രമിക്കുന്നതി​നിടെ ജീവഭായ്​ക്ക് നേരെ സിംഹം തിരിയുകയും കൊലപ്പെടുത്തുകയും ചെയ്​തു.

സിംഹത്തിന്‍റെ ആക്രമണത്തിൽ ആട്​ ചത്തിരുന്നു. കുടിലിന്​ സമീപത്തെ മാമ്പഴ​ത്തോട്ടത്തിൽനിന്ന്​ ജീവാഭായ്​യുടെ മൃതദേഹം കണ്ടെത്തി. സംഭവത്തിന്​ ശേഷം ഗ്രാമത്തിലിറങ്ങിയ സിംഹത്തെ വനംവകുപ്പ്​ പിടികൂടി.

നേരത്തേയും പ്രദേശത്ത്​ സിംഹത്തിന്‍റെ ആക്രമണമുണ്ടാകുകയും നിരവധിപേർക്ക്​ ജീവൻ നഷ്​ടമാകുകയും ചെയ്​തിട്ടുണ്ട്​.