ജഡ്ജിമാരുടെ വിരമിക്കൽപ്രായം ഉയർത്തണമെന്ന്​ ബാർ കൗൺസിൽ

ന്യൂഡൽഹി: സുപ്രീംകോടതിയിലെയും ഹൈകോടതികളിലെയും ജഡ്ജിമാരുടെ വിരമിക്കൽ പ്രായം ഉയർത്തണമെന്ന്​ ബാർ കൗൺസിലുകളുടെ സംയുക്​ത പ്രമേയം. സംസ്ഥാന ബാർ കൗൺസിലുകൾ, ഹൈകോടതി ബാർ അസോസിയേഷനുകൾ, ബാർ കൗൺസിൽ ഓഫ്​ ഇന്ത്യ എന്നിവയുടെ ഭാരവാഹികൾ ചേർന്നാണ്​ പൊതു നിർദേശം മുന്നോട്ടുവെച്ചത്​.

ഹൈകോടതി ജഡ്ജിമാരുടെ കാര്യത്തിൽ വിരമിക്കൽ പ്രായം 62ൽനിന്ന്​ 65ഉം സുപ്രീംകോടതി ജഡ്ജിമാരുടേത്​ 67ഉം ആയി ഉയർത്തണമെന്നാണ്​ നിർദേശം. ഇതിന്​ ഭരണഘടന ഭേദഗതി പാർലമെന്‍റിൽ കൊണ്ടുവരേണ്ടതുണ്ട്​. സുപ്രീംകോടതി ജഡ്ജിമാർ 65ൽ വിരമിക്കുന്നത്​ വളരെ നേരത്തെയാണെന്ന കാഴ്ചപ്പാട്​ ഈയിടെ വിരമിച്ച ചീഫ്​ ജസ്റ്റിസ്​ എൻ.വി. രമണയും ​അ​റ്റോർണി ജനറൽ കെ.കെ. വേണുഗോപാലും അഭിപ്രായപ്പെട്ടിരുന്നു.