കർണാടക മുഖ്യമന്ത്രിയായി ബസവരാജ്​ ബൊമ്മൈ അധികാരമേറ്റു

ബംഗളൂരു: ബി.എസ്​. യെദിയൂരപ്പയുടെ പിൻഗാമിയായി കർണാടക മുഖ്യമന്ത്രിയായി ചുമതലയേറ്റ്​ ബസവരാജ്​ ബൊമ്മൈ. ഗവർണർ തവർചന്ദ്​ ഗെഹ്​​േലാട്ടിന്‍റെ സാന്നിധ്യത്തിൽ ബൊമ്മൈ സത്യപ്രതിജ്ഞ ചെയ്​ത്​ അധികാരമേറ്റു. ബംഗളൂരുവിൽ നടന്ന ചടങ്ങിൽ യെദിയൂരപ്പയും സന്നിഹിതനായിരുന്നു.

തിങ്കളാഴ്ച നടന്ന ബി.ജെ.പി എം.എൽ.എമാരുടെ യോഗത്തിലാണ്​ 61കാരനായ ബൊമ്മൈയെ മുഖ്യമന്ത്രിയാക്കാനുള്ള തീരുമാനമെടുത്തത്​. സത്യപ്രതിജ്ഞക്ക്​ മുമ്പ്​ യെദിയൂരപ്പയുമായി കൂടിക്കാഴ്ച നടത്തുകയും ചെയ്​തിരുന്നു.

യെദി​യൂരപ്പയുടെ വിശ്വസ്​തനായ ബൊമ്മൈ ലിംഗായത്തിന്‍റെ പ്രധാന നേതാക്കളിൽ ഒരാളാണ്​. ബസവരാജിനെ തന്‍റെ പിൻഗാമിയാക്കണമെന്ന യെദിയൂരപ്പയുടെ ആവശ്യം നേതൃത്വം അംഗീകരിക്കുകയായിരുന്നു. യോഗത്തിൽ യെദിയൂരപ്പയുടെ നിർദേശത്തെ ഉപമുഖ്യമന്ത്രിയായിരുന്ന ഗോവിന്ദ്​ കർജോൽ പിന്താങ്ങി. യെദിയൂരപ്പയുടെ രാജിയെ തുടർന്ന്​ കർണാടകയിലെ ലിംഗായത്ത്​ മഠാധിപതികളിൽനിന്നുയർന്ന പ്രതിഷേധംകൂടി കണ​ക്കിലെടുത്താണ്​ മറ്റു പരീക്ഷണങ്ങൾക്ക്​ മുതിരാതെ ബി.ജെ.പി തീരുമാനം.

ഹവേരി ജില്ലയിലെ ഷിഗ്ഗോൺ മണ്ഡലത്തിൽനിന്നുള്ള എം.എൽ.എയാണ്​ അദ്ദേഹം. യെദിയൂരപ്പ മന്ത്രിസഭയിലെ ആഭ്യന്തര, നിയമ, പാർലമെന്‍ററി വകുപ്പുകൾ കൈകാര്യം ചെയ്​തത്​ ബൊമ്മൈയായിരുന്നു. ജനത പാർട്ടിയുടെ മുൻ മുഖ്യമന്ത്രി എസ്​.ആർ. ബൊമ്മെയുടെ മകനാണ്​. എച്ച്​.ഡി. ദേവഗൗഡ, രാമകൃഷ്​ണ ഹെഗ്​ഡെ തുടങ്ങിയ മുതിർന്ന ജനതാദൾ നേതാക്കളോടൊപ്പം പ്രവർത്തിച്ചിട്ടുണ്ട്​. ജനതാദൾ യുനൈറ്റഡിൽനിന്ന്​ 2008 ഫെബ്രുവരിയിൽ ബി.ജെ.പിയിൽ ചേർന്ന അദ്ദേഹം ആദ്യ യെദിയൂരപ്പ സർക്കാറിൽ ജലവിഭവ വകുപ്പ്​ മന്ത്രിയായിരുന്നു. രണ്ടു തവണ എം.എൽ.സിയും മൂന്നു തവണ എം.എൽ.എയുമായി. മെക്കാനിക്കൽ എൻജിനീയറിങ്​ ബിരുദധാരിയായ അദ്ദേഹം മുമ്പ്​ ടാറ്റ ഗ്രൂപ്പിൽ എൻജിനീയറായിരുന്നു. ഹുബ്ബള്ളി^ ധാർവാഡ്​ സ്വദേശിയാണ്​.