ഓക്​സിജൻ നിലച്ചു; ഡൽഹി ബത്ര ഹോസ്​പിറ്റലിൽ മരിച്ചത്​ ഡോക്​ടറടക്കം എട്ടുപേർ

ന്യൂഡൽഹി: മെഡിക്കൽ ഓക്​സിജൻ നിലച്ചതിനെ തുടർന്ന്​ ഡൽഹിയിലെ ബത്ര ഹോസ്​പിറ്റലിൽ മരിച്ചത്​ ഡോക്​ടറടക്കം എട്ട്​ കോവിഡ്​ രോഗികൾ. ശനിയാഴ്ച ഉച്ചക്ക്​ 11.45 ഓടെയാണ്​ ഇവരുടെ മരണം സംഭവിച്ചത്​. 1.30ഒാടെ ഓക്​സിജൻ ടാങ്കർ ആശുപത്രിയിലെത്തിയ ശേഷമാണ്​ ഓക്​സിജൻ വിതരണം പുനരാരംഭിച്ചത്​. 80 മിനിറ്റോളമാണ്​ ഗുരുതരനിലയിൽ ആശുപത്രിയിൽ ചികിത്സയിലുള്ള 230 രോഗികൾക്ക്​ ഓക്​സിജൻ ഇല്ലാതെ കഴിയേണ്ടി വന്നത്​ എന്ന്​ ആശുപത്രി അധികൃതർ ഡൽഹി ഹൈകോടതിയിൽ നൽകിയ പരാതിയിൽ ചൂണ്ടിക്കാട്ടി.

ആശുപത്രിയിലെ ഐ.സി.യുവിലുണ്ടായിരുന്ന ആറ്​ രോഗികളും കോവിഡ്​ വാർഡിൽ ചികിത്സയിലായിരുന്ന രണ്ടുപേരുമാണ്​ മരിച്ചത്​. ആശുപത്രിയിലെ ഗ്യാസ്​ട്രോഎന്‍ററോളജി വിഭാഗം തലവൻ ഡോ. ആർ.കെ. ഹിമാതാനിയും മരിച്ചവരിൽ ഉൾപ്പെടും. 307 രോഗികളാണ്​ ആശുപത്രിയിൽ ചികിത്സയിലുള്ളത്​. അതിൽ 230 പേർ ഓക്​സിജൻ സപ്പോർട്ടിൽ കഴിയുന്നവരാണ്​. രാവിലെ ആറിന്​ തന്നെ ഓക്​സിജൻ തീരുന്നത്​ സംബന്ധിച്ച്​ അധികൃതരെ അറിയിച്ചിരുന്നെന്ന്​ ബത്ര ആശുപത്രി എക്​സിക്യൂട്ടിവ്​ ഡയറക്​ടർ ഡോ. സുധാൻശു ബങ്കട കോടതിയെ അറിയിച്ചു.

'ആരും മരിച്ചില്ലെന്ന്​ കരുതുന്നു' എന്ന്​ കോടതി പ്രത്യാശ പ്രകടിപ്പിച്ചപ്പോൾ 'ഞങ്ങളുടെ ഡോക്​ടറടക്കം എട്ടുപേർ മരിച്ചു' എന്നായിരുന്നു ആ​ശുപത്രി അധികൃതരുടെ പ്രതികരണം. ഇത്​ രണ്ടാം തവണയാണ്​ ബത്ര ആശുപത്രിയിൽ ഓക്സിജൻ ക്ഷാമം നേരിടുന്നത്​. ഏപ്രിൽ 24ന്​ ഓക്​സിജൻ നിലക്കുമെന്ന അവസ്​ഥ എത്തിയെങ്കിലും അവസാന നിമിഷം പ്രശ്​നം പരിഹരിക്കപ്പെടുകയായിരുന്നു. ​