'സഹോദരന്' ആശുപത്രിക്കിടക്ക വേണമെന്ന് അഭ്യർഥിച്ച്​ കേന്ദ്രമന്ത്രി; രാജ്യത്തിന്‍റെ ആരോഗ്യമേഖലയുടെ ദുരവസ്​ഥയെന്ന്​ നെറ്റിസൺസ്​

ന്യൂഡൽഹി: കേന്ദ്ര റോഡ്​ ഗതാഗത സഹമന്ത്രി വി.കെ. സിങിന്‍റെ ഒരു ട്വീറ്റ്​ ആയിരുന്നു ഞായറാഴ്ച സോഷ്യൽ മീഡിയയിലെ ചർച്ചാ വിഷയം. 'സഹോദരന് കോവിഡ്​ ചികിത്സക്കായി ആശുപത്രി കിടക്ക വേണമെന്നായിരുന്നു അത്​. കോവിഡ്​ ചികിത്സക്കായി സൗകര്യം ലഭ്യമല്ലാതെ കേ​​ന്ദ്രമന്ത്രിയുടെ ബന്ധു പോലും ബുദ്ധിമുട്ടുന്നു എന്ന തരത്തിലുള്ള ചർച്ചകൾക്കാണ്​ ഇത്​ വഴിതെളിച്ചത്​. രാജ്യ​ത്തിന്‍റെ ആരോഗ്യ മേഖലയുടെ ദുരവസ്​ഥയുടെ പ്രതീകമായി കേന്ദ്രമന്ത്രിയുടെ പോസ്റ്റിനെ നെറ്റിസൺസ്​ എടുത്തുകാട്ടി.

വിവാദമായതോടെ മന്ത്രി ട്വീറ്റ്​ നീക്കി. ​താനുമായി ബന്ധമുള്ള വ്യക്തിക്ക് വേണ്ടിയല്ല സഹായം അഭ്യര്‍ഥിച്ചതെന്ന് വിശദീകരിച്ച്​ വി.കെ. സിങ് വേറെ പോസ്റ്റിട്ടു. സഹായം ആവശ്യമുള്ളയാള്‍ തന്‍റെ സഹോദരനല്ലെന്നും മറിച്ച് മനുഷ്യത്വത്തിന്‍റെ പേരിലുള്ള ബന്ധമാണെന്നും ആയിരുന്നു അദ്ദേഹത്തിന്‍റെ വിശദീകരണം.

സ്വന്തം മണ്ഡലമായ ഗാസിയാബാദിലെ കോവിഡ് ബാധിതനായ വ്യക്തിക്ക് വേണ്ടിയാണ്​ കേന്ദ്രമന്ത്രി സഹായം തേടിയത്​. കോവിഡ് സ്ഥിരീകരിച്ചയാൾക്ക്​ ഗാസിയാബാദിലെ ഒരു ആശുപത്രിയിലും കിടക്ക ലഭിക്കാതെ വന്നതോടെയായിരുന്നു ഇത്​. "സഹായിക്കൂ, എന്‍റെ 'സഹോദരന്' കോവിഡ് ചികിത്സയ്ക്കായി ഒരു ആശുപത്രി കിടക്ക ആവശ്യമാണ്. ഗാസിയാബാദില്‍ ഇപ്പോള്‍ കിടക്കകള്‍ ലഭ്യമല്ല" എന്നാണ്​​ ജില്ലാ കലക്ടറെ ടാഗ്ചെയ്തു മന്ത്രി ട്വീറ്റ് ചെയ്തത്​.