ചോദ്യങ്ങൾക്ക്​ ഉത്തരം പറയൂ, ഇൗ ഓ​ട്ടോറിക്ഷയിൽ യാത്ര ഫ്രീ

അറിവിനായുള്ള അടങ്ങാത്ത ദാഹത്തിന്‍റെ ഏറ്റവും മികച്ച ഉദാഹരണമാണ്​ സുരഞ്ജൻ കർമാക്കർ എന്ന ഓ​ട്ടോറിക്ഷ ഡ്രൈവർ. തന്‍റെ തൊഴിൽ ജീവിതത്തിനിടയിലും പരമാവധി അറിവ്​ ആർജിക്കുക എന്നതാണ്​ അദ്ദേഹത്തിന്‍റെ ലക്ഷ്യം. അതിനായി ഒരു സൂത്രവും സുരഞ്ജൻ കർമാക്കർ കണ്ടെത്തി. തന്‍റെ ഇ ഓ​ട്ടോറിക്ഷയിൽ യാത്ര ചെയ്യുന്ന ആളുകളോട്​ ജനറൽ നോളജ്​ ചോദ്യങ്ങൾ ചോദിക്കും.

ഉത്തരം പറയുന്നവർക്ക്​ ഓ​ട്ടോറിക്ഷയിൽ യാത്ര ഫുൾ ഫ്രീ. ഹൗറയിലെ ലിലുവയിൽ നിന്നുള്ള ഇ-റിക്ഷ (ടോട്ടോ) ഡ്രൈവറാണ്​ സുരഞ്ജൻ കർമാക്കർ. അറിവും കൂടുതൽ പഠിക്കാനുള്ള ആകാംക്ഷയും കൊണ്ട് യാത്രക്കാരെ വിസ്മയിപ്പിക്കുകയാണ്​ കർമാക്കർ. കഴിഞ്ഞ ദിവസം അദ്ദേഹത്തിന്‍റെ ഓ​ട്ടോറിക്ഷയിൽ യാത്ര ചെയ്​ത സങ്കലൻ സർക്കാർ ഫേസ്ബുക്കിൽ പങ്കുവെച്ച ഒരു പോസ്റ്റ് ആണ്​ ഇപ്പോൾ സുരഞ്ജൻ കർമാക്കറിനെ കുറിച്ച്​ ലോകം അറിയാൻ ഇട വരുത്തിയിരിക്കുന്നത്​. കഴിഞ്ഞ ദിവസം സങ്കലൻ സുരഞ്ജന്‍റെ ഓ​ട്ടോയിൽ യാത്രക്ക്​ കയറിയ അനുഭവമാണ്​ ഫേസ്​ബുക്കിൽ കുറിച്ചത്​. ഇന്ന് ഞാൻ ലിലുവയിൽ കണ്ടിട്ടുള്ളതിൽ വച്ച് ഏറ്റവും രസകരമായ വ്യക്തികളിൽ ഒരാളെ കണ്ടുമുട്ടി.

ഞങ്ങൾ അദ്ദേഹത്തിന്‍റെ ടോട്ടോയിൽ (ബാറ്ററിയിൽ ഓടുന്ന ഇ-റിക്ഷ) രംഗോലി മാളിലേക്ക് യാത്ര ചെയ്യവേ, പെട്ടെന്ന് അദ്ദേഹം തിരിഞ്ഞ് ഞങ്ങളോട് ചോദിച്ചു, നിങ്ങൾക്ക് 15 ജനറൽ നോളജ്​ ചോദ്യങ്ങൾക്ക്​ ഉത്തരം നൽകാൻ കഴിയുമെങ്കിൽ ഞാൻ നിങ്ങളിൽനിന്ന്​ യാത്രാനിരക്ക് ഇൗടാക്കില്ല -സർക്കാർ ഫേസ്​ബുക്ക്​ പോസ്റ്റിൽ പറയുന്നു. താൻ ആറാം ക്ലാസിൽ പഠിക്കുമ്പോൾ സ്‌കൂൾ വിടേണ്ടി വന്ന കാര്യവും കർമാക്കർ സർക്കാറിനോട്​ പങ്കുവെച്ചു. എന്നാൽ അതൊന്നും തന്‍റെ അറിവിനോടുള്ള ദാഹം കുറച്ചില്ലെന്നും ഇപ്പോഴും അത്​ തുടരുകയാണെന്നും അദ്ദേഹം പറയുന്നു. ലിലുവാ ബുക്ക് ഫെയർ ഫൗണ്ടേഷനിലെ അംഗമായ കർമാക്കർ തന്‍റെ റിക്ഷയിൽ ടിപ്പുസുൽത്താൻ അടക്കമുള്ള ചരിത്ര പുരുഷൻമാരുടെ ചിത്രങ്ങളും പതിപ്പിച്ചിട്ടുണ്ട്​. താൻ ഒരേ സമയം ഹിന്ദുവും മുസ്​ലിമും ആണെന്ന്​ സുരഞ്ജൻ കർമാക്കർ പറയുന്നു.