ബംഗളൂരു കഫേ സ്ഫോടനം: ഒരാൾ കൂടി പിടിയിൽ

ബംഗളൂരു: വൈറ്റ്ഫീൽഡ് ബ്രൂക്ക്ഫീൽഡിലെ രാമേശ്വരം കഫേയിലുണ്ടായ ബോംബ് സ്ഫോടനവുമായി ബന്ധപ്പെട്ട് ഒരാൾകൂടി അന്വേഷണ സംഘത്തിന്റെ പിടിയിലായി. ഉത്തര കന്നട സിർസി ദാസനക്കൊപ്പ സ്വദേശി അബ്ദുൽ ഷുക്കൂർ (33) ആണ് എൻ.ഐ.എയുടെ പിടിയിലായത്.

പ്രധാന പ്രതികളായ അബ്ദുൽ മതീൻ താഹ, മുസവ്വിർ ഹുസൈൻ എന്നിവരെ സഹായിച്ചതായാണ് ഷുക്കൂറിനെതിരായ ആരോപണം. ഇയാൾക്ക് നിരോധിക്കപ്പെട്ട തീവ്രവാദ സംഘടനയുമായി ബന്ധമുണ്ടെന്നും മുമ്പ് കർണാടകയിൽ നടന്ന സമാന സംഭവങ്ങളിൽ പ്രതികൾക്ക് സഹായം ചെയ്തിരുന്നതായും എൻ.ഐ.എ പറയുന്നു.

ഉത്തര കന്നടയിലെ ബനവാസിയിൽനിന്ന് കസ്റ്റഡിയിലെടുത്ത ഇയാളെ എൻ.ഐ.എ സംഘം ബംഗളൂരുവിലേക്ക് കൊണ്ടുവന്നു.