അഭയകേന്ദ്രത്തിലെ പീഡനം: ബലാൽസംഗത്തിനു മുമ്പ്​ കുട്ടികൾക്ക്​ മയക്കു ഗുളിക നൽകിയിരുന്നതായി സംശയം

പട്​ന: ബിഹാറിലെ മുസാഫർപൂരിലെ അഭയകേന്ദ്രത്തിൽ പെൺകുട്ടികൾ പീഡിപ്പിക്കപ്പെട്ട സംഭവത്തിൽ കുട്ടികൾക്ക്​ മയക്കു ഗുളികകൾ നൽകിയിരുന്നതായി സംശയം. ബലാൽസംഗത്തിന്​ മുമ്പ്​ എല്ലാ ദിവസവും രാ​ത്രി മയങ്ങുന്നതിനുള്ള ഗുളികകൾ പെൺകുട്ടികൾക്ക്​ നൽകിയതായാണ്​ പൊലീസി​​​​െൻറ സംശയം. 

പട്​ന മെഡിക്കൽ കോളജിൽ വെച്ച്​ 29 പെൺകുട്ടികളെ വൈദ്യസംഘം പരിശോധനക്ക്​ വിധേയമാക്കിയതിൽ നിന്നാണ്​ മയക്കു ഗുളിക നൽകിയിരുന്നെന്ന അനുമാനത്തിലേക്ക്​ പൊലീസ്​ എത്തിച്ചേർന്നത്​. അഭയകേന്ദ്രത്തി​​​​െൻറ വനിത മാനേജർ എല്ലാ ദിവസവും രാത്രി അത്താഴത്തിനു ശേഷം തങ്ങൾക്ക്​ വിരയിളകുന്നതിനുള്ള ഗുളിക തരാറുണ്ടായിരുന്നെന്ന്​ കുട്ടികൾ ഡോക്​ടർമാരോട്​ പറഞ്ഞിരുന്നു. 

എന്നാൽ സാധാരണ വിരയിളക്കാൻ നൽകാറുള്ള ആൽബൻറസോൾ എന്ന ഗുളികയല്ല കുട്ടികൾക്ക്​ നൽകിയിരുന്നത്​. മയക്കം വരുന്ന തരത്തിലുള്ള ഗുളികകൾ ആണ്​ നൽകിയതെന്നാണ്​ പരിശോധനയിൽ വ്യക്തമായത്​. ഗുളിക കഴിക്കുന്നേതോടെ കുട്ടികൾ പെ​െട്ടന്ന്​ ഉറങ്ങിപ്പോകാറു​ണ്ടായിരുന്നുവെന്നും അടിവയറ്റിലും മറ്റുമുള്ള വേദനയോ​െടയാണ്​ അവർ ഉണരാറുണ്ടായിരുന്നതെന്നും അന്വേഷണ ഉദ്യോഗസ്​ഥർ പറഞ്ഞു. 

34 പെൺകുട്ടികൾ ലൈംഗിക പീഡിനത്തിനിരയായെന്ന് വൈദ്യപരിശോധനയിൽ കണ്ടെത്തിയിരുന്നു. സംഭവത്തിൽ പ്രതികളായ 11പേരിൽ 10 പേരെയും പൊലീസ്​ അറസ്​റ്റ്​ ചെയ്​തിട്ടുണ്ട്​. അന്തേവാസികളായ പെൺകുട്ടികളെ അഭയ​േ​​കന്ദ്രം ജീവനക്കാരും രാഷ്​ട്രീയക്കാരും ലൈംഗികമായി പീഡിപ്പിച്ചു​െവന്നാണ്​ കേസ്​. 

ലൈംഗിക ബന്ധത്തിനു വിസമ്മതിച്ച പെൺകുട്ടിയെ ബലാത്​സംഗത്തിനിരയാക്കി കത്തിച്ച്​ മൃതദേഹം അഭയകേന്ദ്രത്തി​​​​​െൻറ മുറ്റത്ത്​ കുഴിച്ചുമൂടിയെന്നും മൊഴിയുണ്ടായിരുന്നു. സംഭവം നേരത്തെ അറിഞ്ഞിട്ടും പുറത്തറിയിക്കാതെ സർക്കാർ മൂടിവെച്ചുവെന്ന്​ ആരോപണമുയർന്നിരുന്നു. പീഡനത്തിനിരയായ പെൺകുട്ടികളുമായി അഭിമുഖം നടത്തി ടാറ്റ ഇൻസ്​റ്റിറ്റ്യൂട്​ ഒാഫ്​ സോഷ്യൽ സയൻസ്​ റിപ്പോർട്ട്​ പ്രസിദ്ധീകരിച്ചതോടെയാണ്​ സംഭവം പുറത്തറിഞ്ഞത്​.