![Bihar woman gets two vaccine doses in five minutes Bihar woman gets two vaccine doses in five minutes](https://www.madhyamam.com/h-upload/2021/06/19/1056887-bihar-woman-gets-two-vaccine-doses-in-five-minutes.webp)
അഞ്ചുമിനിറ്റിനിടെ സ്ത്രീക്ക് ലഭിച്ചത് രണ്ടു ഡോസ് വാക്സിൻ; ആദ്യത്തേത് കോവിഷീൽഡ്, പിന്നെ കോവാക്സിൻ
text_fieldsപട്ന: ബിഹാറിൽ 60കാരിക്ക് അഞ്ചുമിനിറ്റിനിടെ ലഭിച്ചത് രണ്ടു ഡോസ് വാക്സിൻ കുത്തിവെപ്പ്. ആദ്യം കുത്തിവെച്ചത് കോവിഷീൽഡും രണ്ടാമത് കോവാക്സിനും.
പട്നയിലെ ഗ്രാമപ്രദേശത്തെ 60കാരിയായ സുനില ദേവിക്കാണ് ദുരനുഭവം. സ്ത്രീ വീട്ടിലെത്തി കുടുംബാംഗങ്ങളോട് പറഞ്ഞപ്പോഴാണ് സംഭവം പുറത്തറിയുന്നത്. ഉടൻ തന്നെ ബന്ധുക്കൾ സ്ത്രീയുമായി ആശുപത്രിയിലെത്തി. തുടർന്ന് ആരോഗ്യവകുപ്പ് രണ്ടു നഴ്സുമാർക്ക് കാരണം കാണിക്കൽ നോട്ടീസ് നൽകി.
ജൂൺ 16നാണ് സംഭവം. ജൂൺ 19വരെ സുനില ഡോക്ടർമാരുടെ നിരീക്ഷത്തിലായിരിക്കും. വാക്സിൻ സ്വീകരിച്ചതിന് ശേഷം സുനിലക്ക് കടുത്ത ക്ഷീണം അനുഭവപ്പെട്ടിരുന്നു.
ബെല്ലാർചക്ക് മിഡിൽ സ്കൂൾ വാക്സിനേഷൻ സെന്ററിൽനിന്ന് ആദ്യഡോസ് വാക്സിൻ സ്വീകരിച്ചശേഷം സുനിലയോട് തൊട്ടടുത്ത മുറിയിൽ വിശ്രമിക്കാനാവശ്യപ്പെട്ടിരുന്നു. തുടർന്ന് അവർ മറ്റൊരു നിരയിൽ നിൽക്കുകയായിരുന്നു. അത് കോവാക്സിൻ സ്വീകരിക്കുന്നവരുടെ വരിയായിരുന്നു. 'എനിക്ക് എങ്ങോട്ടുപോകണമെന്ന് അറിയില്ലായിരുന്നു. ചിലർ എന്റെ അടുത്ത് വരികയും അടുത്ത ഡോസ് വാക്സിൻ നൽകുകയും ചെയ്തു. അഞ്ചുമിനുട്ട് മുമ്പ് എനിക്ക് മറ്റൊരു നഴ്സ് വാക്സിൻ നൽകിയെന്ന് പറഞ്ഞെങ്കിലും കുത്തിവെപ്പെടുത്ത നഴ്സ് കേട്ടില്ല' -സുനില പറഞ്ഞു. ഒരു കൈയിൽ തന്നെയാണ് രണ്ടു ഡോസ് വാക്സിൻ കുത്തിവെപ്പെടുത്തതെന്നും അവർ കൂട്ടിച്ചേർത്തു.
ഇതോടെ സുനില വീട്ടിലെത്തി മകനോട് കാര്യം പറഞ്ഞു. തുടർന്ന് കുടുംബാംഗങ്ങളും സുഹൃത്തുക്കളും വാക്സിനേഷൻ സെന്ററിലെത്തുകയായിരുന്നു. സംഭവത്തിൽ ആരോഗ്യ വകുപ്പ് പ്രതികരിക്കാൻ തയാറായിട്ടില്ല. അതേസമയം, രണ്ടു നഴ്സുമാർക്ക് കാരണം കാണിക്കൽ നോട്ടീസ് അയച്ച് വകുപ്പുതല അന്വേഷണം ആരംഭിച്ചതായാണ് വിവരം.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.