നോയിഡയിലെ വിമാനത്താവള മാതൃകയെന്ന പേരിൽ ബി.ജെ.പി പ്രചരിപ്പിച്ചത്​ ചൈനീസ്​ വിമാനത്താവളം; വിമർശനം

ന്യൂഡൽഹി: രാജ്യത്തെ ഏറ്റവും വലിയ വിമാനത്താവളത്തിന്​ പ്രധാനമന്ത്രി നരേന്ദ്രമോദി നവംബർ 25ന്​​ ഉത്തർപ്രദേശിൽ തറക്കല്ലിട്ടു. യു.പിയിലെ ജേവറിലാണ്​ അന്തരാഷ്​ട്ര വിമാനത്താവളം ഉയരുക. 2024ഓടെ വിമാനത്താവളത്തിന്‍റെ ആദ്യ ഘട്ടം പൂർത്തിയാക്കുമെന്നാണ്​ കേന്ദ്ര സംസ്​ഥാന സർക്കാറുകളുടെ വാദം. യു.പിയിലെ അഞ്ചാമത്തെ അന്താരാഷ്​ട്ര വിമാനത്താവളമെന്നതിന്​ പുറമെ രാജ്യത്തെ ഏറ്റവും വലിയ വിമാനത്താവളമെന്നാണ്​ ബി.ജെ.പിയുടെ വാദം.

എന്നാൽ, മോദി വിമാനത്താവളത്തിന്​ തറക്കല്ലിട്ടതിന്​ പിന്നാലെ നോയിഡ വിമാനത്താവള മാതൃകയെന്ന പേരിൽ ഒരു ചിത്രവും സമൂഹമാധ്യമങ്ങളിൽ വൻതോതിൽ പ്രചരിച്ചു. ബി.ജെ.പി നേതാക്കളടക്കം പങ്കുവെച്ച ചിത്രം ചൈനീസ്​ വിമാനത്താവളത്തി​േന്‍റതാണെന്നാണ്​ ഇപ്പോൾ പുറത്തുവരുന്ന വിവരം. ചൈനയിലെ ബെയ്​ജിങ്​ ഡാക്​സിങ്​ വിമാനത്താവളത്തി​േന്‍റതാണ്​ ചിത്രം. 2019ൽ 'ദി ഗാർഡിയൻ' പങ്കുവെച്ച ബെയ്​ജിങ്​ വിമാനത്താവളത്തിന്‍റെ ചിത്രത്തിന്​ സമാനമാണ്​ ഇപ്പോൾ നോയിഡയുടേതെന്ന പേരിൽ പ്രചരിക്കുന്ന ചിത്രം. 2019 സെപ്​റ്റംബറിലാണ്​ ഈ വിമാനത്താവളം തുറന്നത്​.

അതേസമയം, നോയിഡ വിമാനത്താവളമെന്ന പേരിൽ ചൈനീസ്​ വിമാനത്താവളത്തിന്‍റെ ചിത്രം ഉപയോഗിച്ചതിനെതിരെ വിമർശനവുമായി ചൈനീസ്​ സർക്കാർ മീഡിയയായ ഗ്ലോബൽ ടെലിവിഷൻ നെറ്റ്​വർക്കിലെ മാധ്യമപ്രവർത്തകർ രംഗത്തെത്തി.

നേരത്തേ, നോയിഡ വിമാനത്താവളത്തി​​േന്‍റതെന്ന പേരിൽ ഉത്തരകൊറിയയിലെ ഇഞ്ചിയോൻ വിമാനത്താവളത്തിന്‍റെ ചിത്രം ബി.ജെ.പി നേതാക്കൾ പങ്കുവെച്ചതിനെ തുടർന്ന്​ വിമർശനങ്ങൾ ഉയർന്നിരുന്നു. ഇതിന്​ പിന്നാലെയാണ്​ ബെയ്​ജിങ്​ വിമാനത്താവളത്തിന്‍റെ ചിത്രം ബി.ജെ.പി വൃത്തങ്ങൾ പങ്കുവെച്ചത്​.

നോയിഡ അന്താരാഷ്ട്ര വിമാനത്താവളത്തെക്കുറിച്ച്​ ബി.ജെ.പി നേതാക്കളുടെയും​ കേന്ദ്ര ​മന്ത്രിമാരുടെയും ട്വീറ്റുകളുടെ കൊളാഷ്​ പങ്കുവെച്ചായിരുന്നു സി.ജി.ടി.എൻ ജീവനക്കാരനായ ഷെൻ ഷിവെയുടെ ട്വീറ്റ്​.

'ഇന്ത്യന്‍ ഭരണകൂടം ചൈനയുടെ ബെയ്​ജിങ്​ ഡാക്​സിങ്​ അന്താരാഷ്​ട്ര വിമാനത്താവളത്തിന്‍റെ ചിത്രം സ്വന്തം 'അടിസ്​ഥാന സൗകര്യവികസത്തിന്‍റെ' തെളിവായി ഉപയോഗി​ച്ചെന്ന്​ കണ്ടപ്പോൾ ഞെട്ടിപ്പോയി' എന്നായിരുന്നു ഷെന്നിന്‍റെ ട്വീറ്റ്​.

കേന്ദ്രമന്ത്രിമാരായ അനുരാഗ്​ താക്കൂർ, പ്രഹ്ലാദ്​ സിങ്​ പ​േട്ടൽ, അർജുൻ രാം മേഘ്​വാഹ, യു.പി ഉപമുഖ്യമ​ന്ത്രി കേശവ്​ പ്രസാദ്​ മൗര്യ തുടങ്ങിയവരാണ്​ നോയിഡ വിമാനത്താവളത്തി​േന്‍റതെന്ന പേരിൽ ചൈനീസ്​ വിമാനത്താവളത്തിന്‍റെ ചിത്രം പങ്കുവെച്ചത്​.

'നോയിഡയിലെ ഏഷ്യയിലെ ഏറ്റവും വലിയ അന്താരാഷ്​ട്ര വിമാനത്താവളം 35,000 കോടിയുടെ നിക്ഷേപം കൊണ്ടുവരും. അതിനുപുറമെ ഒരുലക്ഷത്തിലധികം പേർക്ക്​ തൊഴിലും നൽകും' -താക്കൂർ പറഞ്ഞു.

അതേസമയം, വ്യാജ ചിത്രങ്ങൾ ഉപയോഗിക്കുന്നതിനെതിരെ പ്രതിപക്ഷ പാർട്ടികൾ പരിഹസിച്ച്​ രംഗത്തെത്തി. നിയമസഭ തെരഞ്ഞെടുപ്പിന്​ രണ്ടുമാസം മാത്രം ശേഷിക്കേ യു.പിയിൽ ബി.ജെ.പി നേട്ടമായി ഉയർത്തിക്കാട്ടുന്ന പലതും വ്യാജമാണെന്നായിരുന്നു സമാജ്​വാദി പാർട്ടിയുടെ ആക്ഷേപം.