ഗോഡ്​സെക്ക്​ സിന്ദാബാദ്​ വിളിക്കുന്നവർ രാജ്യത്തിന്​ നാണക്കേട് ​-​വരുൺ ഗാന്ധി

ന്യൂഡൽഹി: ഗാന്ധി ജയന്തി ദിനത്തിൽ ഗോഡ്​സെക്ക്​ സിന്ദാബാദ്​ വിളിക്കുന്ന ഹിന്ദുത്വവാദികൾക്കെതിരെ ബി.ജെ.പി നേതാവ്​ വരുൺ ഗാന്ധി. ഗോ​ഡ്​സെക്ക്​ സിന്ദാബാദ്​ വിളിക്കുന്നവർ രാജ്യത്തിന്​ നാണക്കേടാണെന്ന്​ വരുൺ ഗാന്ധി ട്വീറ്റ്​ ചെയ്​തു.

''ഇന്ത്യ എല്ലാകാലത്തും ഒരു ആത്മീയകേന്ദ്രമായിരുന്നു. മഹാത്മാഗാന്ധി ഈ രാജ്യത്തിന്​ ആത്മീയ അടിത്തറ പാകുകയും ധാർമിക ശക്തി നൽകുകയും ചെയ്​തു. അതാണ്​ ഇന്നും ഈ രാജ്യത്തിന്‍റെ ഏറ്റവും വലിയ ശക്തി. 'ഗോഡ്​സെ സിന്ദാബാദ്​' എന്ന്​ ട്വീറ്റ്​ ചെയ്യുന്നവർ ഒരു ഉത്തരവാദിത്തവുമില്ലാതെ രാജ്യത്തെ നാണം കെടുത്തുകയാണ്​'' -വരുൺ ഗാന്ധി ട്വീറ്റ്​ ചെയ്​തു.

എന്നാൽ ഇതിനു പിന്നാലെ വരുൺ ഗാന്ധിക്ക്​ മറുപടിയുമായി നിരവധി പേ​ർ ട്വീറ്റിന്​ താഴെയെത്തി. താങ്കളുടെ പാർട്ടിക്കാരും നേതാക്കളുമാണ്​ അങ്ങനെ ചെയ്യുന്നതെന്ന്​ നിരവധി പേർ കമന്‍റ്​ ചെയ്​തു. ​പറയുന്നത്​ ആത്മാർഥമാണെങ്കിൽ താങ്കൾ ബി.ജെ.പി വിട്ട്​ കോൺഗ്രസിൽ ചേരണമെന്നും നിരവധി പേർ കമന്‍റ്​ ചെയ്​തു.

ഗാന്ധി ജയന്തി ദിനത്തിൽ 'ഗോഡ്‌സെ സിന്ദാബാദ്' എന്ന ഹാഷ്​ടാഗിലാണ്​ നിരവധി പേർ ഗാന്ധിയെ അപമാനിക്കുന്നതും ഗോഡ്​സെയെ പ്രശംസിക്കുന്നതുമായ കുറിപ്പുകളും ചിത്രങ്ങളും പങ്കുവെച്ചത്​.

ഗോഡ്​സെയെ പുകഴ്​ത്തുന്നതിനെതിരെ വ്യാപക വിമർശനങ്ങൾ പല കോണിൽനിന്നും ഉയർന്നിരുന്നു​. 'നാഥുറാം ഗോഡ്സെ സിന്ദാബാദ്' എന്ന മുദ്രാവാക്യം​ പ്രചരിപ്പിക്കുന്ന സംഘികളെ ന​േരന്ദ്രമോദി മൗനത്തിലൂടെ പിന്തുണക്കുകയാണെന്ന്​ കോൺഗ്രസ്​ നേതാവും എം.പിയുമായ മാണിക്കം ടാഗോർ കുറ്റപ്പെടുത്തി. 'ആരാണ്​ ഇൗ മുദ്രാവാക്യത്തിന്‍റെ ഉത്തരവാദിയെന്നത്​ പ്രസക്​തമായ ചോദ്യമാണ്​. ഇതിനെതിരെ മോദി നടപടിയെടുക്കു​േമാ? അതോ ഇത്​ ചെയ്യുന്ന സംഘികളെ മൗനത്തിലൂടെ പിന്തുണക്കുമോ?'- മാണിക്കം ട്വീറ്റിലൂടെ ചോദിച്ചു.