മോദിക്ക്​ മൃത്യുഞ്​ജയ മന്ത്രവുമായി ബി.ജെ.പിയുടെ പ്രാർഥന യജ്ഞം

ന്യൂഡൽഹി: പ്രധാനമന്ത്രി നരേന്ദ്ര മോദിയെ പഞ്ചാബിലെ ഫിറോസ്​പുരിൽ കർഷകർ തടഞ്ഞത്​ രാഷ്​ട്രീയ ആയുധമാക്കിയ ബി.ജെ.പി നരേന്ദ്ര മോദിയു​ടെ ദീർഘായുസ്സിനായി രാജ്യത്തിന്‍റെ വിവിധ ഭാഗങ്ങളിൽ മഹാമൃത്യുഞ്ജയ മ​ന്ത്രം ജപിച്ച്​ പ്രാർഥന യജ്ഞങ്ങൾ നടത്തി.

ഡൽഹി പ്രീതിവിഹാറിലെ ദുർഗ മന്ദിറിൽ ബി.ജെ.പി ദേശീയ സെക്രട്ടറി അരുൺസിങ്ങിന്‍റെ നേതൃത്വത്തിലും മധ്യപ്രദേശിലെ ഭോപാലിൽ​ മുഖ്യമന്ത്രി ശിവ്​രാജ്​ സിങ്​ ചൗഹാന്‍റെ നേതൃത്വത്തിലും പ്രാർഥന യജ്ഞം നടന്നു. കൊണാട്ട്​ പ്ലേസിലെ ഹനുമാൻ മന്ദിറിലും ഝണ്ഡേവാലാൻ ക്ഷേത്രത്തിലും ബി.ജെ.പി നേതാക്കൾ പ്രാർഥന നടത്തി.

പഞ്ചാബ്​ ബി.ജെ.പി പ്രസിഡന്‍റ്​ അശ്വിനി ശർമ ഗവർ​ണറെ കണ്ട്​ ആഭ്യന്തര മന്ത്രിയെ പുറത്താക്കണമെന്ന്​ ആവശ്യപ്പെട്ടു.