നേതാവിനെ തല്ലി​; 10 അംഗങ്ങൾക്ക്​ കാരണം കാണിക്കൽ നോട്ടീസ്​ നൽകി ബി.ജെ.പി

കൊൽക്കത്ത: നേതാവിനെ തല്ലിയതിന്​ 10 ബി.ജെ.പി അംഗങ്ങൾക്ക്​ കാരണം കാണിക്കൽ നോട്ടീസ്​ നൽകി പശ്​ചിമബംഗാൾ സംസ്ഥാന നേതൃത്വം. മെയ്​ 10ന്​ പാർട്ടി സംസ്ഥാന ആസ്ഥാനത്ത്​ നടന്ന യോഗത്തിനിടെയുണ്ടായ അനിഷ്​ട സംഭവങ്ങളിലാണ്​ നടപടി.

ദക്ഷിണ കൊൽക്കത്ത യൂണിറ്റിലെ 10 അംഗങ്ങൾക്ക്​ ​മേഖല പ്രസിഡൻറ്​ ശങ്കർ സിക്​ദറാണ്​ നോട്ടീസ്​ നൽകിയത്​. നോട്ടീസ്​ നൽകിയ വിവരം പാർട്ടി വക്​താവ്​ സാമിക്​ ഭട്ടാചാര്യയയും സ്ഥിരീകരിച്ചു. ജനറൽ സെക്രട്ടറി ഗാന്ധർ ചാറ്റർജിയെ മർദിച്ച സംഭവുമായി ബന്ധപ്പെട്ട്​ ഒരാഴ്​ചക്കുള്ളിൽ വിശദീകരണം നൽകണമെന്നാണ്​ നോട്ടീസിൽ ആവശ്യപ്പെട്ടിരിക്കുന്നത്​. ഇക്കാലയളവിൽ പാർട്ടി പരിപാടികളിൽ പ​ങ്കെടുക്കരുതെന്നും ഇവരോട്​ നിർദേശിച്ചിട്ടുണ്ട്​.

10 പേർ ചേർന്ന്​ ജനറൽ സെക്രട്ടറിമാരായ ഗാന്ധർ ചാറ്റർ​ജിയേയും തനുജ ചാറ്റർജിയേയും മർദിച്ചുവെന്നാണ്​ പരാതി. പശ്​ചിമബംഗാളിൽ തൃണമൂൽ കോൺഗ്രസ്​ വ്യാപകമായി അക്രമങ്ങൾ അഴിച്ചു വിടുകയാണെന്ന്​ ബി.ജെ.പി ആരോപണം ഉന്നയിച്ചിരുന്നു. ഇതിന്​ പിന്നാലെയാണ്​ പാർട്ടിയിലെ തല്ലി​െൻറ കഥ പുറത്ത്​ വരുന്നത്​.