പുതുച്ചേരിയിൽ ആധാർ വിവരങ്ങൾ ചോർത്തി ബി.ജെ.പിയുടെ തെരഞ്ഞെടുപ്പ്​ പ്രചാരണം; ഗുരുതരമെന്ന്​ മ​ദ്രാസ്​ ഹൈകോടതി

ചെന്നൈ: പുതുച്ചേരി നിയമസഭ തെരഞ്ഞെടുപ്പ്​ പ്രചാരണത്തിനായി ബി.ജെ.പി ആധാർ വിവരങ്ങൾ ചോർത്തുന്നതായി ആരോപണം. വ്യക്തിവിവരങ്ങൾ ചോർത്തുകയും വാട്​സ്​ആപ്​ നമ്പർ ശേഖരിച്ച്​ പ്രചാരണ സന്ദേശങ്ങൾ അയക്കുന്നതായും മദ്രാസ്​ ഹൈകോടതിയിൽ സമർപ്പിച്ച ഹരജിയിൽ പറയുന്നു.

സംഭവത്തിൽ വിശദമായ അന്വേഷണം നടത്തി രണ്ടു ദിവസത്തിനകം റിപ്പോർട്ട്​ നൽകണമെന്ന്​ മദ്രാസ്​ ഹൈകോടതി തെരഞ്ഞെടുപ്പ്​ കമീഷന്​ നിർദേശം നൽകി. ഇത്​ ഗുരുതര കുറ്റമാണെന്നും തെരഞ്ഞെടുപ്പ്​ കമീഷന്​ അന്വേഷണം സൈബർ സെല്ലിന്​ കൈമാറി ഒഴിയാൻ സാധിക്കില്ലെന്നും കോടതി കൂട്ടിച്ചേർത്തു.

പുതുച്ചേരി ഡി.വൈ.എഫ്​.ഐ യൂനിറ്റ്​ പ്രസിഡന്‍റ്​​ ആനന്ദാണ്​ മദ്രാസ്​ ഹൈകോടതിയിൽ ഹരജി നൽകിയത്​. പ്രാദേശിക ബി.ജെ.പി നേതാക്കൾ ആധാറിൽനിന്ന്​ ഫോൺ നമ്പർ ശേഖരിക്കുകയും പിന്നീട്​ ഓരോ മണ്ഡലങ്ങളിലും ബൂത്ത്​ ലെവൽ വാട്​സ്​ആപ്​ ഗ്രൂപ്പുകൾ നിർമിച്ചതായും ഹരജിയിൽ പറയുന്നു. നിരവധി വാട്​സ്​ആപ്​ ​ഗ്രൂപ്പുകളാണ്​ ഇത്തരത്തിൽ നിർമിച്ചിരിക്കുന്നത്​. ബൂത്ത്​ അടിസ്​ഥാനത്തിലെ വോട്ടർമാരെ കേന്ദ്രീകരിച്ചാണ് പ്രവർത്തനം​. ഇതിലൂടെ നിയമസഭ മണ്ഡലങ്ങളുടെ സന്ദേശങ്ങളും പ്രചാരണങ്ങളു​ം പങ്ക​ുവെക്കുമെന്നും പരാതിക്കാരൻ പറയുന്നു.

വാട്​സ്​ആപ്​ ​ഗ്രൂപ്പുകളുടെ അഡ്​മിനുമായി ബന്ധ​െപ്പടാൻ ശ്രമിച്ചുവെന്നും അപ്പോൾ ബി.ജെ.പി പുത​ു​േച്ചരി യൂനിറ്റിന്‍റെ കീഴിൽ മാത്രം വോട്ടർമാരെ ഉൾപ്പെടുത്തി 953 വാട്​സ്​ആപ്​ ​ഗ്രൂപ്പുകളുണ്ടെന്ന ഞെട്ടിക്കുന്ന വിവരം ലഭിച്ചതായും പരാതിയിൽ പറയുന്നു.

വാട്​സ്​ആപ്​ കൂടാതെ ബി.ജെ.പി നേതാക്കൾ വോട്ടർമാരെ ഫോൺ വിളിച്ചതായും പരാതിയിൽ പറയുന്നു. പേര്​, വോട്ടിങ്​ ബൂത്ത്​, മണ്ഡലം തുടങ്ങിയ വിവരങ്ങൾ ഇത്തരത്തിൽ ഫോൺ വിളിച്ച്​ ആരാഞ്ഞതായും പരാതിയിലുണ്ട്​.

സംഭവം അന്വേഷിക്കാൻ പ്രത്യേക അന്വേഷണ സംഘത്തെ നിയോഗിക്കണമെന്നും ബി.ജെ.പി സ്​ഥാനാർഥികൾ ഇത്തരത്തിൽ വോട്ട്​ അഭ്യർഥിക്കുന്നത്​ തടയണമെന്നുമാണ്​ പരാതിക്കാരന്‍റെ ആവശ്യം.