മുതിർന്ന ബി.ജെ.പി നേതാവ്​ ഏക്​നാഥ്​ ഖാദ്​സേ പാർട്ടി വിട്ടു; എൻ.സി.പിയിൽ ചേരും

മുംബൈ: മഹാരാഷ്​ട്രയിലെ മുതിർന്ന ബി.ജെ.പി നേതാവ്​ ഏക്​നാഥ്​ ഖാദ്​സേ പാർട്ടി വിട്ടു. വൈകാതെ അദ്ദേഹം എൻ.സി.പിയിൽ ചേരുമെന്ന്​ മഹാരാഷ്​ട്ര മന്ത്രി ജയന്ത്​ പാട്ടീൽ അറിയിച്ചു. വെള്ളിയാഴ്​ച രണ്ട്​ മണിക്ക്​ നടക്കുന്ന ചടങ്ങിൽ അദ്ദേഹം ഔദ്യോഗികമായി എൻ.സി.പി പക്ഷത്ത്​ എത്തും.

ഏക്​നാഥ്​ ഖാദ്​സേയുടെ രാജിക്കത്ത്​ ലഭിച്ച വിവരം ബി.ജെ.പിയും സ്ഥിരീകരിച്ചിട്ടുണ്ട്​. ഇന്ന്​ രാവിലെ വരെ അദ്ദേഹം ബി.ജെ.പിയുടെ ഭാഗമായിരുന്നു. പാർട്ടിയിൽ തുടരാൻ ഞങ്ങളെല്ലാവരും അദ്ദേഹത്തെ നിർബന്ധിച്ചു. ഖാദ്​സേയുടെ ഭാവി യാത്രക്ക്​ എല്ലാവിധ ആശംസകളും നേരുന്നുവെന്ന്​ ബി.ജെ.പി വക്​താവ്​ കേശവ്​ ഉപാധ്യായ പറഞ്ഞു.

കഴിഞ്ഞ കുറേ മാസങ്ങളായി ഖാദ്​സേ എൻ.സി.പിയിൽ ചേരുമെന്ന്​ അഭ്യൂഹങ്ങളുണ്ടായിരുന്നു. ​എൻ.സി.പി നേതാവ്​ ശരത്​ പവാറും ഇതുമായി ബന്ധപ്പെട്ട്​ പ്രസ്​താവന നടത്തിയിരുന്നു. മഹാരാഷ്​ട്രയിൽ ബി.ജെ.പിയെ പടുത്തുയർത്തുന്നതിൽ ഖാദ്​സേയുടെ പങ്ക്​ വിസ്​മരിക്കാനാവില്ലെന്നായിരുന്നു പവാറി​െൻറ പ്രസ്​താവന. ധനകാര്യമന്ത്രിയെന്ന നിലയിലും പ്രതിപക്ഷ നേതാവെന്ന നിലയിലും അദ്ദേഹം മികച്ച പ്രവർത്തനം കാഴ്​ചവെച്ചു. പാർട്ടിയിൽ അവഗണിക്കുന്നുവെന്ന തോന്നലിൽ അദ്ദേഹം ചിലപ്പോൾ ബി.ജെ.പി വിട്ട്​ മറ്റൊരു പാർട്ടിക്കൊപ്പം ചേർന്ന്​ പ്രവർത്തിച്ചേക്കാമെന്ന്​ പവാർ പറഞ്ഞിരുന്നു.

അഴിമതി ആരോപണങ്ങളെ തുടർന്ന്​ ദേവേന്ദ്ര ഫഡ്​നാവിസ്​ മന്ത്രിസഭയിൽ നിന്ന്​ ഖാദ്​സേ രാജിവെച്ചിരുന്നു. അദ്ദേഹത്തി​െൻറ രാജിക്ക്​ പിന്നിൽ ഫഡ്​നാവിസ്​ തന്നെയാണെന്നായിരുന്നു അനുയായികൾ ആരോപിച്ചിരുന്നത്​. 2019 നിയമസഭ തെരഞ്ഞെടുപ്പിൽ അദ്ദേഹത്തിന്​ സീറ്റുനൽകിയിരുന്നില്ല.