ബംഗാളിൽ ബി.ജെ.പിക്ക്​ വീണ്ടും അടിതെറ്റുന്നു; രജീബ്​ ബാനർജിയും തൃണമൂലിൽ തിരിച്ചെത്തിയേക്കും

കൊൽക്കത്ത: നിയമസഭ തെരഞ്ഞെടുപ്പി​ന്​ പിന്നാലെ പശ്ചിമ ബംഗാളിൽ ബി.ജെ.പിക്ക്​ വീണ്ടും അടിതെറ്റുന്നു. തൃണമൂൽ വിട്ട്​ ബി.ജെ.പിയിൽ ചേർന്ന​ മുകുൾ റോയ്​ മടങ്ങിയതിന്​ പിന്നാലെ പ്രമുഖ നേതാവ്​ രജീബ്​ ബാനർജിയും തൃണമൂലിലേക്ക്​ മടങ്ങാനൊരുങ്ങുകയാണെന്ന്​ വിവരം.

തൃണമൂൽ നേതാവ്​ കുനാൽ ഘോഷുമായി രജീബ്​ ബാനർജി നടത്തിയ കൂടിക്കാഴ​്​ച തൃണമൂലിലേക്ക്​ മടങ്ങാനുള്ള ഒരുക്കത്തിന്‍റെ ആദ്യപടിയാണെന്നാണ്​ വിലയിരുത്തൽ. തൃണമൂൽവിട്ട രജീബ്​ ബാനർജി ദോംജൂറിൽനിന്ന്​ ബി.ജെ.പി ടിക്കറ്റിൽ നിയമസഭയിലേക്ക്​ ജനവിധി തേടിയിരുന്നു. എന്നാൽ കനത്ത പരാജയം ഏറ്റുവാങ്ങേണ്ടി വരികയായിരുന്നു.

തൃണമൂൽ വക്താവ്​ കുനാൽ ഘോഷിന്‍റെ കൊൽക്കത്തയിലെ വസതിയിൽ ഇരുവരും ഏറെനേരം കൂടിക്കാഴ്ച നടത്തിയതായാണ്​ പുറത്തുവരുന്ന വിവരം.

അതേസമയം, ഇരുവരും തമ്മിലുള്ള കൂടിക്കാഴ്ചയിൽ രാഷ്​ട്രീയ ചർച്ചകളില്ലെന്നും സൗഹൃദ സന്ദർശനം മാത്രമാണ്​ നടത്തിയതെന്നുമായിരുന്നു രജീബിന്‍റെ പ്രതികരണം. 'ഇതിനെ മറ്റൊരു രീതിയിൽ കാണാൻ ശ്രമിക്കണ്ട. കുനാലിന്‍റെ അതേ പ്രദേശത്ത്​ താമസിക്കുന്ന എന്‍റെ ബന്ധുവിനെ കാണാനായിരുന്നു സന്ദർശനം. അതിൽ മറ്റൊന്നുമില്ല, മര്യാദയുള്ള സന്ദർശനം മാത്രമായിരുന്നു. അവിടെ രാഷ്​ട്രീയ ചർച്ചകൾക്ക്​ സ്​ഥാനമുണ്ടായിരുന്നില്ല' -രജീബ്​ ബാനർജി പറഞ്ഞു.

കഴിഞ്ഞദിവസം, തൃണമൂൽ വിട്ട്​ ബി.ജെ.പിയിൽ ചേർന്ന മുകുൾ റോയ്​ പാർട്ടിയിലേക്ക്​ തിരിച്ചെത്തിയിരുന്നു. മുകുൾ റോയ്​ക്കൊപ്പം തൃണമൂൽ വിട്ട്​ ബി.ജെ.പിയി​ലെത്തിയശേഷം തിരിച്ചുവരാൻ ആഗ്രഹിക്കുന്നവരുടെ കാര്യം പരിഗണിക്കുമെന്നും മുഖ്യമന്ത്രി മമത ബാനർജി പറഞ്ഞിരുന്നു. അതേസമയം, തെരഞ്ഞെടുപ്പ്​ നടന്ന ഏപ്രിൽ -മേയ്​ മാസങ്ങൾക്ക്​ തൊട്ടു​മുമ്പ്​ തൃണമൂൽ വിട്ട്​ ബി.ജെ.പിയിലെത്തിയ നേതാക്കളെ തിരിച്ചെടുക്കില്ലെന്നും മമത വ്യക്തമാക്കിയിരുന്നു.

നേരത്തേ, ബി.ജെ.പി നേതാക്കൾക്ക്​ രജീബ്​ ബാനർജി തന്‍റെ സോഷ്യൽ മീഡിയ അക്കൗണ്ടിലൂടെ ഒരാഴ്ച മുമ്പ്​ മുന്നറിയിപ്പ്​ നൽകിയിരുന്നു. തെ​രഞ്ഞെടുക്കപ്പെട്ട സർക്കാരിനെതിരെ രാഷ്​ട്രപതി ഭരണം ഉയർത്തി കാണിക്കുന്ന ഭരണകൂടത്തിന്‍റെ ഭീഷണികളോട്​ ജനങ്ങൾ ദയ കാണിക്കില്ലെന്നായിരുന്നു രജീബ്​ ബാനർജിയുടെ പോസ്റ്റ്​. ബി​.ജെ.പിയിൽനിന്ന്​ അകന്ന്​ തൃണമൂലിലെത്താനുള്ള നീക്കത്തിന്‍റെ ഭാഗമായാണെന്നാണ്​ വിലയിരുത്തൽ.

ജനുവരിയിലാണ്​ രജീബ്​ ബാനർജി തൃണമൂൽ വിട്ടത്​. തൃണമൂലിൽ പ്രവർത്തന, അഭിപ്രായ സ്വാതന്ത്ര്യമില്ലെന്ന്​ ചൂണ്ടിക്കാട്ടിയായിരുന്നു കൊഴിഞ്ഞുപോക്ക്​. 2011ലും 2016ലും തൃണമൂൽ ടിക്കറ്റിൽ മന്ത്രിയായിരുന്നു ഇദ്ദേഹം.

നിയമസഭ തെരഞ്ഞെടുപ്പിന്​ പിന്നാലെ, തൃണമൂൽ വിട്ടതിൽ ഖേദിക്കു​ന്നുവെന്ന്​ വ്യക്തമാക്കി തൃണമൂൽ ​എം.എൽ.എമാരായിരുന്ന നിരവധി നേതാക്കൾ കത്തയച്ചിരുന്നു. ദീപേന്ദു ബിശ്വാസ്, സൊ​നാ​ലി ഗുഹ തുടങ്ങിയവരാണ്​ തൃണമൂലി​േലക്ക്​ മടങ്ങാനായി ഒരുങ്ങുന്നത്​​.