ദുരിതാശ്വാസ പ്രവർത്തനങ്ങൾക്കുള്ള സാധനങ്ങൾ മോഷ്​ടിച്ചു; ബി.ജെ.പി നേതാവ്​ സുവേന്ദു അധികാരിക്കെതിരെ കേസ്​

കൊൽക്കത്ത: ദുരിതാശ്വാസ പ്രവർത്തനങ്ങൾക്കുള്ള സാധനങ്ങൾ മോഷ്​ടിച്ചതിന്​ ബി.ജെ.പി നേതാവ്​ സുവേന്ദു അധികാരിക്കെതിരെ കേസ്​. പശ്​ചിമബംഗാളിലെ പുർബ മേദിനിപൂർ ജില്ലയിൽ കാന്തി മുനിസിപ്പൽ ​ഗോഡൗണിൽ നിന്നും ലക്ഷങ്ങൾ വിലവരുന്ന സാധനങ്ങൾ മോഷ്​ടിച്ചെന്നാണ്​ കേസ്​. കാന്തി മുൻസിപ്പൽ അഡ്​മിനിസ്​ട്രേറ്റവീ്​ ബോർഡ്​ അംഗം റാത്​ന മാന നൽകിയ പരാതിയിലാണ്​ പൊലീസ്​ നടപടി.

സുവേന്ദു അധികാരിയുടെ നിർദേശം പ്രകാരം സഹോദരനും മുൻ മുൻസിപ്പൽ ചെയർമാനുമായ സൗമേന്ദു അധികാരി കാന്തി മുൻസിപ്പൽ ഗോഡൗണിൽ നിന്ന്​ സാധനങ്ങൾ മോഷ്​ടിച്ചുവെന്നാണ്​ പരാതി. ബലമായി പൂട്ടുതകർത്താണ്​ സാധനങ്ങൾ കൊണ്ടു പോയത്​. മെയ്​ 29നാണ്​ കേസിനാസ്​പദമായ സംഭവമുണ്ടായത്​. ജൂൺ ഒന്നിനാണ്​ ഇതുസംബന്ധിച്ച പരാതി പൊലീസിന്​ നൽകിയത്​.

തൃണമൂൽ കോൺഗ്രസ്​ പ്രവർത്തകർ സാധനങ്ങൾ മോഷ്​ടിക്കുകയാണെന്ന ആരോപണം ബി.ജെ.പി നിരവധി തവണ ഉയർത്തിയിരുന്നു. ഇതിന്​ പിന്നാലെയാണ്​ സുവേന്ദു അധികാരിക്കെതിരായ കേസ്​. അതേസമയം, കേസ്​ സംബന്ധിച്ച്​ സുവേന്ദു അധികാരി ഇതുവരെ പ്രതികരിച്ചിട്ടില്ല.