റിപ്പബ്ലിക്​ ദിനത്തിൽ ബ്രഹ്​മോസ്​ യുദ്ധകാഹളം 'സ്വാമിയേ ശരണമയ്യപ്പ'

ന്യൂഡല്‍ഹി: രാജ്പഥിലെ റിപ്പബ്ലിക് ദിന പരേഡില്‍ 861 ബ്രഹ്‌മോസ് മിസൈല്‍ റജിമെന്റിന്‍റെ യുദ്ധകാഹളമായി ഇത്തവണ ഉൾ​പ്പെടുത്തിയത്​ 'സ്വാമിയേ ശരണമയ്യപ്പ' എന്ന ശരണമന്ത്രം. പരമ്പരാഗതമായി ഉപയോഗിക്കുന്ന ദുര്‍ഗാ മാതാ കീ ജയ്, ഭാരത് മാതാ കീ ജയ് എന്നിവക്കൊപ്പമാണ് 'സ്വാമിയേ ശരണമയ്യപ്പ'യും ഉള്‍പ്പെടുത്തിയത്.

ജനുവരി 15ന് ഡല്‍ഹിയില്‍ നടന്ന 73-ാമത് കരസേനാ ദിനാചരണത്തിന്​ ഡൽഹിയിൽ നടന്ന പരേഡിലും ബ്രഹ്‌മോസിന്‍റെ യുദ്ധകാഹളം 'സ്വാമിയേ ശരണമയ്യപ്പ' മന്ത്രമായിരുന്നു. ക്യാപ്​റ്റൻ ഖമറുൽ സമനായിരുന്നു​ റിപ്പബ്ലിക്​ ദിന പരേഡിൽ ബ്രഹ്​മോസ്​ മിസൈൽ റെജിമെന്‍റിനെ നയിച്ചത്​.

കരയിൽ നിന്നും ആകാശത്തു നിന്നും അന്തർവാഹിനികളിൽ നിന്നും വിക്ഷേപിക്കാവുന്ന സൂപ്പര്‍സോണിക് ക്രൂയിസ് മിസൈലാണ്​ ബ്രഹ്‌മോസ്. ഓപറേഷന്‍ മേഘദൂത്, ഓപറേഷന്‍ വിജയ്, ഓപറേഷന്‍ പരാക്രം എന്നിവയില്‍ ബ്രഹ്‌മോസ് റജിമെന്‍റ്​ പങ്കെടുത്തിട്ടുണ്ട്.