ബി.ജെ.പിക്കും തൃണമൂലിനുമെതിരെ പോരാടാൻ ആഹ്വാനം ചെയ്ത് ബുദ്ധദേവ് ഭട്ടാചാര്യ

കൊൽക്കത്ത: കേന്ദ്രത്തിലെ ബി.ജെ.പി സർക്കാറിനും ബംഗാളിലെ തൃണമൂൽ ഭരണത്തിനുമെതിരെ പോരാടാൻ യുവാക്കളോട് ആഹ്വാനം ചെയ്ത് മുൻ മുഖ്യമന്ത്രി ബുദ്ധദേവ് ഭട്ടാചാര്യ. ഡി.വൈ.എഫ്‌.ഐയുടെ 11ാമത് അഖിലേന്ത്യ സമ്മേളനത്തിൽ പങ്കെടുത്തവർക്കുള്ള ഓഡിയോ സന്ദേശത്തിലാണ് അദ്ദേഹം ഇക്കാര്യം പറഞ്ഞത്.

ഇടതുപക്ഷത്തിന്റെ ശക്തമായ തിരിച്ചുവരവിലൂടെ മാത്രമേ കേന്ദ്ര-സംസ്ഥാന സർക്കാറുകളുടെ ജനവിരുദ്ധ-ഫാഷിസ്റ്റ് നയങ്ങളെ ചെറുക്കാൻ കഴിയൂ എന്നും അദ്ദേഹം പറഞ്ഞു. വാർധക്യസഹജ അസുഖങ്ങളെ തുടർന്ന് 78കാരനായ ബുദ്ധദേവ് ഭട്ടാചാര്യ കുറച്ച് വർഷങ്ങളായി പൊതുജീവിതത്തിൽനിന്ന് വിട്ടുനിൽക്കുകയാണ്