സർക്കാർ വാദം തള്ളി: അണ്ണാസമാധിക്ക്​ സമീപം കലൈജ്ഞർക്കും​ അന്ത്യ വി​ശ്രമം

ചെന്നൈ: കരുണാനിധിയുടെ ഭൗതിക ശരീരം അണ്ണാ സമാധിക്ക്​ സമീപം സംസ്​കരിക്കാൻ സ്​ഥലം അനുവദിക്കാനാവില്ലെന്ന സർക്കാർ വാദം മ​ദ്രാസ്​ ഹൈകോടതി തള്ളി. മറിന ബീച്ചിൽ സ്​ഥലം അനുവദിച്ച്​ ഹൈകോടതി ഉത്തരവായി. ബുധനാഴ്​ച രാവിലെ എട്ടരയോടെ​   മദ്രാസ്​ ഹൈകോടതി ആക്​ടിങ്​ ചീഫ്​ ജസ്​റ്റിസ്​ ജി. രമേഷ്​, എസ്​.എസ്​. സുന്ദർ എന്നിവരടങ്ങിയ ഡിവിഷൻ ബെഞ്ചാണ്​ വാദംകേട്ടത്​. പത്തേ മുക്കാലോടെ​ വിധിവന്നു​.  കേന്ദ്ര സർക്കാറി​​​െൻറ തീരസംരക്ഷണ നിയമ പ്രകാരമാണ്​ തീരുമാനമെന്ന്​ തമിഴ്​നാട്​ സർക്കാർ വാദിച്ചു.  പെരിയാർ, മുൻ മുഖ്യമന്ത്രിമാരായ ജാനകി രാമചന്ദ്രൻ, കാമരാജ്​, രാജാജി എന്നിവർ മരിച്ചപ്പോൾ കടൽക്കരയിൽ സ്​ഥലം അനുവദിക്കാത്തത്​ ചൂണ്ടിക്കാട്ടി.  

ജയലളിത മുഖ്യമന്ത്രിയായിരി​െക്കയാണ്​ മരിച്ചത്​.  മുഖ്യമന്ത്രിമാർക്ക്​ മറിനയിൽ ഇടം അനുവദിക്കുന്നത്​ പതിവാണെന്ന്​ അഡ്വ. സി.എസ്​. വൈദ്യനാഥൻ വ്യക്തമാക്കി. ജയലളിതയുടെ സംസ്​കാരത്തിന്​ സംസ്​ഥാന സർക്കാർ ഇറക്കിയ ഉത്തരവ്​ കോടതി പരിശോധിച്ചു. കരുണാനിധി വിഷയത്തിൽ കേസുകൾ പിൻവലിച്ചതിനാൽ സർക്കാറിന്​ നിയമപരമായ തടസ്സമെന്താണെന്ന്​ കോടതി ചോദിച്ചു. അതിന്​ സർക്കാർ അഭിഭാഷകന്​ വിശദീകരണം നൽകാനായില്ല. മുഖ്യമന്ത്രിയായിരിക്കെ മരിച്ചാൽ മാത്രമേ മറിനയിൽ ഇടംനൽകാൻ കഴിയൂവെന്ന്​ നിയമമില്ല.

നേതാക്കൾക്ക്​ സ്​മൃതി മണ്ഡപം  നിർമിക്കാനുള്ള സ്​ഥലമായി 1988ൽ കരുണാനിധി സർക്കാർ ഉത്തരവുള്ളതായി  അഭിഭാഷകൻ ചൂണ്ടിക്കാട്ടി. കോടതിയിൽ കേസുകൾ നിലവിലുള്ളതിനാൽ മറിന കടൽക്കരയിൽ സ്​ഥലം അനുവദിക്കാനാവില്ലെന്ന്​ ചീഫ്​ സെക്രട്ടറി ഗിരിജ ​ൈവദ്യനാഥൻ പത്രക്കുറിപ്പ്​ ഇറക്കിയിരുന്നു. ഗിണ്ടിയിലെ കാമരാജ്​- ഗാന്ധി മണ്ഡപം സ്​ഥിതിചെയ്യുന്ന സ്​ഥലത്ത്​ രണ്ട്​ ഏക്കർ ഭൂമി അനുവദിക്കാമെന്നും​ അറിയിച്ചു.  കരുണാനിധിയുടെ മക്കളായ സ്​റ്റാലിനും കനിമൊഴിയും ഉൾപ്പെടെ കുടുംബാംഗങ്ങളും ഡി.എം.കെ നേതാക്കളും മുഖ്യമന്ത്രി എടപ്പാടി പളനിസാമിയുടെ വസതിയിൽചെന്ന്​ ഇക്കാര്യത്തെക്കുറിച്ച്​  അഭ്യർഥിച്ചിരുന്നു. തുടർന്നാണ്​ സർക്കാർ നിലപാട്​ വ്യക്തമാക്കിയത്​.

സർക്കാർ തീരുമാനത്തിനെതിരെ പ്രവർത്തകർ പ്രതിഷേധരംഗത്തിറങ്ങി. രാഹുൽ ഗാന്ധി, രജനികാന്ത്​ ഉൾപ്പെടെയുള്ള പ്രമുഖർ സർക്കാർ നിലപാടിനെതിരെ പ്രതികരിച്ചു. ഇൗ നിലയിലാണ്​ ഡി.എം.കെ നിയമ വിഭാഗം സെക്രട്ടറി ആർ.എസ്​. ഭാരതിയുടെ നേതൃത്വത്തിൽ കോടതിയെ സമീപിച്ചത്​. ഹരജി അടിയന്തര സ്വഭാവത്തോടെ പരിഗണിക്കണമെന്ന ആവശ്യം കോടതി അംഗീകരിച്ചു. ബുധനാഴ്​ച പുലർച്ച ഒരു മണിക്ക്​ വിചാരണ നടത്തി. ഇൗ സമയത്ത്​ മറിന ബീച്ചിൽ നേതാക്കൾക്ക്​ സ്​മൃതി മണ്ഡപം നിർമിക്കുന്നതിനെതിരെ സമർപ്പിച്ച അഞ്ചു കേസുകളും ഹരജിക്കാർ നാടകീയമായി പിൻവലിച്ചു. പിന്നീട്​ കേസുകൾ തള്ളിയതായി കോടതി അറിയിച്ചു.